Ta lum Cesarea ay jtul winik te Cornelio sbiil te mukʼ skʼoplal te jaʼ kapitan yuʼun soldadoetik ta Roma. Manchukme maba judío, ichʼbil ta mukʼ yuʼun te judioetike. Kʼax lek yoʼtan, melel bayal bin lek ya spas ta stojol te pobreetike. Te Cornelio schʼuunej te Jehová sok spisil-ora ya skʼopon. Ta jun buelta, chiknaj jtul chʼul-abat ta stojol sok jich albot: “La yaʼiybat akʼop te Diose. Tikuna bael awiniktak ta lum Jope, te banti ay te Pedro, akʼa skʼanbeyik te ya xtal yilate”. Te Cornelio la stikun ta oranax oxtul winiketik ta Jope, te jteb ma sta 50 kilometro snamalil ta stojol sur.

Ta yorail-abi, ta Jope, te Pedro la yil jun najalsitil. La yil chambalametik te ma xjuʼ ya sweʼik te judioetike. Ta patil la yaʼiy te ay machʼa la yal te akʼa sweʼe. Te Pedro ma la skʼan sok la yal: “Maʼyuk jweʼoj chambalametik te boloben skʼoplale”. Jich sutbot: “Ma xa awal te boloben skʼoplal te chambalametik ini, te Dios ya yal te maba bolobenix skʼoplale”. Jaʼnix jich la yal te machʼa yak ta kʼope: “Ay oxtul winiketik ta stiʼ ana, jokinlana bael”. Te Pedro bajtʼ yiltiklan te winiketike sok la sjojkʼoylanbey bin swentail te talemike. Jich la sut te winiketike: “Jaʼ la stikunotik tal te Cornelio, jtul kapitan yuʼun soldadoetik ta Roma. Ya skʼan te yakuk xbaat ta sna ta lum  Cesarea”. Te Pedro la yikʼtiklan jilel ta sna ta ajkʼabal-abi. Ta yan kʼajkʼal, la sjokinlan bael te winiketik ta Cesarea. Jaʼnix jich ay chaʼoxtul hermanoetik ta Jope te bajtʼik-euke.

Kʼalal te Cornelio la yil kʼot te Pedro la skejan sba ta stojol. Pero te Pedro la yalbey: “Jajchan. Pajal winikotik. Te Dios la yalbon te yakuk xtalon ta anae, manchukme ma x-ochotik ta snaik te jyanlumetik o te machʼa ma judiouke. Jaʼ yuʼun, awokoluk, cholbon kaʼiy te bin swentail te la atikunon ta ikʼele”.

Te Cornelio la scholbey yaʼiy te Pedro: “Ayix chaneb kʼajkʼal te yakon ta skʼoponel Dios, jich yuʼun jtul chʼul-abat la yalbon te yakuk jtikunat ta ikʼele. Awokoluk, chola kaʼiykotik te bin ya yal te Jehovae”. Te Pedro la sut: “La kilix te maʼyuk machʼa tsabil yuʼun te Diose, lek ya yil spisil te machʼa ya x-ichʼot ta mukʼ yuʼune”. Te Pedro bayal bin la yakʼtiklanbey snop ta swenta te Jesuse. Jich yuʼun te Cornelio sok te machʼatik tey ayik-ae, la yichʼik chʼul espiritu sok la yichʼik jaʼ.