Ngei Kesarea, ho vha hu na mulangammbi wa ndeme wa Roma ane a vhidzwa Koronelio. Naho o vha e si Muyuda, Vhayuda vho vha vha tshi mu ṱhonifha. O vha a tshi thusa vha shayaho nga u ḓifunela. Koronelio o vha a tshi fulufhela Yehova na u rabela khae tshifhinga tshoṱhe. Ḽiṅwe ḓuvha, muruṅwa o mbo ḓi ḓa kha Koronelio nahone a ri: ‘Mudzimu o pfa thabelo dzanu. Rumani vhanna zwino vha ye Yope, hune Petro a dzula hone nahone ni mu humbele uri a ḓe kha inwi.’ Nga u ṱavhanya, Koronelio o mbo ḓi rumela vhanna vhararu ngei Yope, hune ha vha vhukule ha khilomithara dza 30 u ya tshipembe.

Nga tshenetsho tshifhinga, ngei Yope, Petro a vhona bono. O vhona zwipuka zwe Vhayuda vha vha vha songo tendelwa u zwi ḽa nahone a pfa ipfi ḽi tshi mu vhudza uri a ḽe. Petro o hana, a ri: ‘Fhedzi a thi athu u vhuya nda ḽa tshipuka tshi songo kunaho vhutshiloni hanga.’ Zwino ipfi ḽa mu vhudza ḽa ri: ‘Ni songo amba uri hezwi zwipuka a zwo ngo kuna. Mudzimu o zwi kunakisa.’ Petro o dovha a vhudziwa uri: ‘Hu na vhanna vhararu muṋangoni waṋu. Ṱuwani navho.’ Petro a ya muṋangoni a vhudzisa avho vhanna uri ndi ngani vhe fhano. Vha fhindula vha ri: ‘Ro rumiwa nga Koronelio,  mulangammbi wa Roma. Ni tea u ḓa nḓuni yawe Kesarea.’ Petro a ramba vhanna uri vha vhe vhaeni vhawe. Nga ḓuvha ḽi tevhelaho, o ṱuwa navho Kesarea, khathihi na vhaṅwe vhahawe vha bvaho Yope.

Musi Koronelio a tshi tou vhona Petro, o mbo ḓi gwadama. Fhedzi Petro a ri: ‘Takuwani! Ndi muthu u fana na inwi. Mudzimu o mmbudza uri ndi ḓe nḓuni yaṋu, naho Vhayuda vha songo tendelwa u ya nḓuni dza Vhannḓa. Mbudzeni zwino uri no mbidzela mini.’

Koronelio a vhudza Petro a ri: ‘Maḓuvha maṋa o fhiraho ndo vha ndi tshi khou rabela Mudzimu nahone muruṅwa a mmbudza uri ndi ni vhidze. Ndi khou humbela uri ni ri funze maipfi a Yehova.’ Petro a ri: ‘Ndo guda uri Mudzimu ha ṱaluli. U ṱanganedza muṅwe na muṅwe ane a ṱoḓa u mu gwadamela.’ Petro o vha funza zwinzhi nga ha Yesu. Koronelio na vhoṱhe vhe a vha e navho vho ḓodzwa nga muya mukhethwa nahone vha lovhedzwa.