Kaseli ɔmɛ fiɛɛ sane kpakpa a ngɛ je ɔ mi tsuo kaa bɔ nɛ Yesu fã mɛ ke a pee ɔ. Ngɛ jeha 47 ɔ mi ɔ, nyɛmimɛ nɛ a ngɛ Antiokia a tsɔ Paulo kɛ Banaba kaa a ya fiɛɛ ngɛ ma kpahi a nɔ. Paulo kɛ Banaba fiɛɛ kɛ kã ngɛ Dɛɛbe, Listra kɛ Ikoniom. Ma nɛ ɔmɛ ngɛ he ko nɛ a tsɛɛ ke Asia Nyafii.

Paulo kɛ Banaba fiɛɛ kɛ tsɔɔ sikatsɛmɛ kɛ ohiatsɛmɛ, kɛ jokuɛwi kɛ nikɔtɔmahi. Nihi fuu kplɛɛ anɔkuale nɛ kɔɔ Kristo he ɔ nɔ. Benɛ Paulo kɛ Banaba ya fiɛɛ kɛ tsɔɔ Sɛgio Paulos nɛ ji Kipro amlaalo ɔ, kunya yelɔ ko ka a nya tsimi. Paulo de kunya yelɔ ɔ ke: ‘Yehowa be mo blɔ ngmɛe.’ Amlɔ nɔuu nɛ kunya yelɔ ɔ hɛ ngmɛ yu. Benɛ Amlaalo Paulos na jã a, e ba pee kaselɔ.

Paulo kɛ Banaba fiɛɛ ngɛ wehi a mi, juahi a nɔ, gbɛjegbɛhi a nɔ, kɛ kpe hehi. Paulo kɛ Banaba tsa nyumu ko nɛ libɔɔ ji lɛ ngɛ Listra. Nihi nɛ a na nyakpɛ ní nɛ ɔ susu kaa mawuhi ji mɛ. Enɛ ɔ he ɔ, a ka kaa a ma ja mɛ. Se Paulo kɛ Banaba kplɛɛ we. A de mɛ ke: ‘Mawu pɛ lɛ e sa kaa nyɛ ja! Wɔɔ lɛɛ nimli kɛkɛ ji wɔ.’ Se Yuda bi komɛ ba lejɛ ɔ nɛ a ba puɛ ni ɔmɛ a juɛmi ngɛ Paulo he. Ni ɔmɛ fiaa Paulo tɛ, nɛ a gbla lɛ kɛ je ma a mi kɛ ya fɔ he ko kaa nɔ ko nɛ e gbo. Se Paulo gbo we! Nyɛmimɛ ɔmɛ ya ye bua lɛ nɔuu, nɛ a kɛ lɛ ho ma a mi ya. Pee se ɔ, Paulo kpale kɛ ho Antiokia ya.

Ngɛ jeha 49 ɔ mi ɔ, Paulo kpale hia blɔ kɛ ya he kpahi. Kekleekle ɔ, e ya slaa nyɛmimɛ nɛ a ngɛ Asia Nyafii ɔ. Lɔ ɔ se ɔ,  e ya fiɛɛ sane kpakpa a ngɛ mahi nɛ a ngɛ Yuropa a. E ya Atene, Efeso, Filipi, Tɛsalonika, kɛ he kpahi. Silas kɛ Luka, kɛ niheyo ko nɛ a tsɛɛ lɛ ke Timoteo ɔ piɛɛ Paulo he kɛ hia blɔ ɔ. A pee kake kɛ to asafohi sisi, nɛ a ye bua nyɛmimɛ ɔmɛ konɛ a he nɛ wa. Paulo hi Korinto ma a mi jeha kake kɛ fã, nɛ e wo nyɛmimɛ ɔmɛ he wami. E fiɛɛ, e tsɔɔ nihi ní, nɛ e ngma womihi kɛ mane asafohi fuu. E peeɔ bo tsu nɛ e juaa hulɔ. Pee se ɔ, Paulo kpale kɛ ho Antiokia ya.

Ngɛ jeha 52 ɔ mi ɔ, Paulo je e blɔ hiami etɛne ɔ sisi ngɛ Asia Nyafii. E ya yiti je tɔɔ ngɛ Filipi, nɛ e kpale e se kɛ ya Korinto. Paulo hi Efeso jehahi fuu. E tsɔɔ nihi ní, e tsa hiɔtsɛmɛ, nɛ e ye bua asafo ɔ. Daa ligbi ɔ, e tuɔ munyu kɛ jeɔ Baiblo ɔ mi ngɛ sukuu asa ko nɔ kɛ woɔ nihi he wami. Nihi fuu bu tue nɛ a tsake a je mi bami. Paulo fiɛɛ sane kpakpa a ngɛ mahi fuu a nɔ. Nyagbe kulaa a, e kpale kɛ ho Yerusalɛm ya.