‘Aka oraqpachanwa predicapjjäta’ sasaw Jesusajj mä mandato jaytäna. Apostolonakajj uk sum phoqapjjäna. 47 maranjja, Antioquía markankir jilatanakajj Pablompir Bernabeampiruw yaqha markanakan predicapjjañapatak khitapjjäna. Jupanakajj taqe chuymaw Asia Menor cheqankir Derbe, Listra, Iconio markanakar sarapjjäna.

Pablompi Bernabeampejj taqeniruw yatiyapjjäna: qollqeninakaru, pobrenakaru, waynanakaru, jilïrinakaru. Waljanirakiw Cristjjat cheqa yatichäwinakar creyipjjäna. Pablompi Bernabeampejj Chipre markan Sergio Paulo sat gobernadoraparus predicapjjänwa. Ukampis mä layqa jaqew jarkʼañ munäna. Ukatwa Pablojj uka jaqer akham säna: ‘Jehová Diosaw castigätam’ sasa. Ukaratpachaw uka layqa jaqejj juykhuptäna. Uk uñjasaw Sergio Paulo gobernadorajj creyentëjjäna.

Pablompi Bernabeampejj taqe cheqan predicapjjäna: utanakana, qhatunakana, thakinakana, sinagoganakana. Mä kutejj Listra markanwa mä cojo jaqer qollapjjäna. Uk uñjirinakajj ‘diosäpjjpachawa’ sasaw adorañ munapjjäna. Ukampis jupanakajj akham sasaw jarktʼapjjäna: ‘¡Diosarukiw adorañasa! Nanakajj jaqenakakïpjjtwa’ sasa. Ukar purinisaw yaqhep judionakajj Pablo contra jaqenakar saytʼayapjjäna. Jaqenakajj qalampiw Pablor kʼupjapjjäna, ukatsti ‘jiwatäjjpachawa’ sasaw marka anqar qatatipjjäna. Ukampis ¡jakaskänwa! Jilat kullakanakajj jankʼakiw yanaptʼir jutapjjäna, markaruw apjjapjjarakïna. Qhepatjja Pablojj Antioquía markaruw kuttʼjjäna.

Pablojj 49 maran wasitat viajïna. Asia Menor toqenkiri cristianonakar tumptʼiriw saräna, ukatjja jukʼamp khurinkir Europa cheqaruw predikir sararakïna. Pablojj Atenas, Éfeso, Filipos, Tesalónica ukhamarak  yaqha markanakaruw saräna. Uka viajenjja Silasampi, Lucasampi, Timoteo waynampiw compañapjjäna. Machaq congregacionanak uttʼayañataki, chʼamañchtʼañatakiw jupanakajj yanaptʼasipjjäna. Pablojj mara chikataniw Corintonkir jilat kullakanakar chʼamañchtʼañatakejj quedasïna. Jupajj wal predicäna, yatichäna, cartanak congregacionanakar qellqarakïna. Carpanak lurasaw trabajïna. Tiempompejj Antioquiaruw kuttʼjjarakïna.

Pablojj Asia Menor toqenwa kimsïr viajep 52 maran qalltäna. Jupajj norte toqeruw Filipos markakam saräna, ukatsti Corinto markakamaw saraqanïna. Pablojj walja maranakaw Éfeso markan quedasïna, ukansti Diosan arunakap yatichäna, usutanak qolläna, congregacionaruw yanaptʼarakïna. Ukatsti sapürurakiw mä escuelan utjkäna uka jachʼa utan discursonak arstʼirïna. Waljanirakiw jupar istʼasajj jan walinak jaytjjapjjäna. Walja markanakan Diosan suma yatiyäwinakap yatiyasajja, Pablojj Jerusalenaruw kuttʼjjäna.