Dioloi angka muridna do parenta ni Jesus. Marbarita na uli do nasida tu sude luat di portibi on. Taon 47 M, disuru angka dongan di Antiokia ma si Paulus dohot si Barnabas marbarita tu godang inganan. Semangat do nasida marbarita tu Asia Kecil (saonari Turki) songon tu Derbe, tu Listra, dohot tu Ikonium.

Marbarita do si Paulus dohot si Barnabas tu sude halak. Godang do na olo manangihon barita taringot Kristus. Tingki i, marbarita ma si Paulus dohot si Barnabas tu gubernur ni Siprus, i ma si Sergius Paulus. Alai adong ma tukang sihir na mangorai nasida. Didok si Paulus ma tu ibana, ‘Dihukum Jahowa nama ho.’ Mapitung ma tukang sihir i. Alani i, gabe porsea ma gubernur i.

Marbarita do si Paulus dohot si Barnabas manang didia pe. Marbarita do nasida sian jabu tu jabu, di pasar, di dalan, dohot di sinagoga. Tingki di Listra, dipamalum si Paulus dohot si Barnabas do sahalak baoa na pengkaton. Ala dirimpu angka halak nasida debata, gabe naeng disomba ma nasida. Alai didok nasida ma, ‘Holan Debata do na ingkon sombaonmu! Jolma do hami!’ Dung i, ro ma piga-piga halak Jahudi mandok gabus taringot si Paulus. Gabe dilempari nasida ma si Paulus. Disampathon ma ibana tu luar ala dirimpu nunga mate. Hape, mangolu dope ibana! Dung i, ro ma angka dongan mangurupi ibana jala diboan ma tu kota. Mulak ma muse si Paulus tu Antiokia.

Taon 49 M, laho ma muse si Paulus marbarita tu inganan na asing. Dung pajumpang ibana dohot angka dongan na di Asia Kecil, laho ma ibana tu Eropa. Laho do muse ibana tu Atena, Epesus,  Pilippi, Tessalonik, dohot tu inganan na asing. Dohot do si Silas, si Lukas, dohot si Timoteus. Dibahen nasida ma huria disi jala dipatogu ma angka dongan. Di Korint ma si Paulus tinggal jala disi ma ibana sada satonga taon. Diurupi ibana ma angka dongan di huria i asa togu. Laho do ibana marbarita, mangajar, jala dibahen ibana do surat tu angka huria. Asing ni i, mambahen tenda do ibana asa adong hepengna. Dung i, mulak ma muse si Paulus tu Antiokia.

Taon 52 M, laho ma muse si Paulus tu Asia Kecil. Nunga tolu hali ibana tusi. Laho ma ibana tu Pilippi dohot tu Korint. Tinggal ma si Paulus di Epesus saleleng piga-piga taon. Mangajari do ibana disi, pamalumhon na marsahit, jala mangurupi huria asa lam togu. Marjamita do ibana ganup ari di aula ni singkola. Gabe godang ma na manangihon ibana jala muba. Dung marbarita ibana di godang inganan, mulak ma ibana tu Jerusalem.