Zezi seli i akoto mun be kɛ be bo jasin fɛ’n asiɛ wunmuan’n su. I sɔ kusu yɛ be yoli-ɔ. Afuɛ 47 nun’n, aniaan nga be o Antiɔsu lɔ’n be sunmannin Pɔlu nin Baanabasi kɛ be ko bo jasin fɛ’n. Be sran nɲɔn’n be bo jasin fɛ’n juejue su’n. Be wlanwlannin Azi Minɛɛ mɛn wunmuan’n nun. Be ɔli Dɛɛbe nin Listri, yɛ Ikoniɔmun.

Pɔlu nin Baanabasi be boli jasin’n kleli sran kwlaa, i sikafuɛ-o, i yalɛfuɛ-o, i gbanflɛn-o, i talua-o, i kpɛnngbɛn-o. Sran kpanngban be sɔli Klisi i su ndɛ’n nun. Kɛ Pɔlu nin Baanabasi bé bó jasin klé Sɛɛzisi Polisi m’ɔ sie Sipri klɔ’n, wunnzue yifuɛ kun kunndɛli kɛ ɔ́ tánndan be ɲrun. Ɔ maan Pɔlu seli i kɛ: ‘Zoova su wa yo ɔ like!’ Be ja nun lɛ’n, wunnzue yifuɛ’n w’a wunman ase kun. Kɛ Sɛɛzisi Polisi wunnin i sɔ’n, ɔ kacili Zezi i sɔnnzɔnfuɛ.

Pɔlu nin Baanabasi be boli jasin fɛ’n lika kwlakwla. Be boli i awloawlo mun be nun, gua mun be bo, akpɔ mun be su, ɔ nin Ɲanmiɛn sulɛ sua mun be nun. Cɛn kun’n, be yoli bubuwafuɛ kun juejue. Kɛ be nga be o lɛ’n be wunnin abonuan sa sɔ’n, be buli i kɛ ɲanmiɛn su lɔ sran mun-ɔn. I sɔ’n ti’n, be kunndɛli kɛ bé sú be. Sanngɛ Pɔlu nin Baanabasi b’a kplinman su. Be seli sran sɔ mun be kɛ: ‘Ɲanmiɛn kunngba cɛ yɛ ɔ fata kɛ amun su i-ɔ! E ti klɔ sran.’ I sin’n, Zuifu wie mun be bali be wa wlawlali sran mun naan be yo Pɔlu i like yaya. I sɔ’n ti’n, sran mun be finfinnin i yɔbuɛ, kpɛkun be cuɛn i ko yili i klɔ’n i sin lɔ. Be buli i kɛ w’a wu. Sanngɛ Pɔlu i ɲin te o su. Aniaan mun be ɔli i wun lɔ ndɛndɛ, kpɛkun be fɛli i be sali be sin klɔ’n su lɔ ekun. Kɛ ɔ cɛli kan’n, Pɔlu sɛli i sin Antiɔsu lɔ.

Afuɛ 49 nun’n, Pɔlu ɔli jasin bolɛ ekun. Ɔ ko niannin aniaan nga be o Azi Minɛɛ lɔ’n be osu. I sin’n, ɔ ɔli lika mmuammua kpa wie mun ekun be nun ko boli jasin fɛ’n. Ɔ ɔli Atɛnin, Efɛzi, Filipu, yɛ Tesaloniki, ɔ nin lika uflɛ wie mun ekun be nun. Pɔlu nin Silasi nin Liki, ɔ nin gbanflɛn kun mɔ be flɛ i Timote’n, yɛ be ɔli-ɔ. Be takali asɔnun mun, kpɛkun be ukali aniaan mun naan be lafi Ɲanmiɛn su kpa. Pɔlu dili afuɛ kun nin sin Korɛnti lɔ, ɔ wlali aniaan mun be fanngan. Ɔ boli jasin fɛ’n, ɔ kleli sran mun be like, kpɛkun ɔ klɛli fluwa ko mannin asɔnun kpanngban. Kɛ ɔ ko yo naan w’a ɲan sika kan’n, ɔ wu tannin sua. Kɛ ɔ cɛli kan’n, ɔ sɛli i sin Antiɔsu lɔ.

Afuɛ 52 nun’n, Pɔlu ɔli jasin bolɛ ekun. I kpɛ nsan su m’ɔ́ kɔ́’n yɛ ɔ o lɛ. Azi Minɛɛ lɔ yɛ ɔ dun mmua ɔli-ɔ. Ɔ ɔli Filipu, i sin’n, ɔ ɔli Korɛnti. Kɛ ɔ ɔli Efɛzi lɔ’n ɔ dili afuɛ kpanngban. Ɔ kleli sran mun be like, ɔ yoli tukpacifuɛ mun be juejue, yɛ ɔ ukali asɔnun’n i nunfuɛ mun. Cɛn kwlakwla’n, ɔ kan Ɲanmiɛn ndɛ’n suklu sua kun nun. Sran kpanngban be tie i ndɛ’n, kpɛkun be kaci be nzuɛn’n. Kɛ ɔ boli jasin fɛ’n nvle kpanngban nun’n, ɔ ɔli Zerizalɛmun.