Abatumwa balibombele umulimo Yesu abapeele uwa kubila imbila nsuma mu calo conse. Mu mwaka wa 47 ninshi Yesu aliya kale ku muulu, bamunyinefwe mu Antioke batumine Paulo na Barnaba ku kubila imbila nsuma. Paulo na Barnaba baile mu kubila imbila nsuma mu Asia Minor monse, bafikile na ku Derbe, ku Lustra na ku Ikonia.

Paulo na Barnaba balebila imbila nsuma ku bantu bonse fye, ku bakwete indalama ishingi, ku bapiina, ku baice na ku bakalamba. Abantu abengi balisumine icine pali Kristu. Ilyo Paulo na Barnaba baleshimikila Sergi Pauli umulashi wa ku Kupro, umuntu umo uwalecita majiki alefwaya ukubakaanya. Paulo aebele uwa majiki ati: ‘Yehova tatemenwe ifyo ulecita.’ Apo pene fye uwa majiki alilekele ukumona. Ilyo Umulashi Pauli amwene ifi, alitetekele.

Paulo na Barnaba baleshimikila abantu imbila nsuma konse fye uko balebasanga, ku ng’anda ne ng’anda, pa maliketi, mu misebo, na mu masunagoge. Ilyo baundepe umwaume uwali umulema mu Lustra, abantu abamweneko ifyo bacitile batendeke ukumona Paulo na Barnaba kwati ni balesa kabili balefwaya no kubapepa. Lelo Paulo na Barnaba balibakeenye, babebele ati: ‘Mulingile ukupepa fye Lesa eka! Ifwe tuli bantu fye.’ Lyena kwali abaYuda bamo abaile ku Lustra kabili ifyo balandile fyalengele abantu bayalukila Paulo. Balimutobele amabwe, bamukulila na ku nse ya musumba, kabili balimushile kulya pa kuti afwe. Nomba Paulo tafwile! Apo pene Abena Kristu banankwe balile mu kumusenda kabili bamutwele mu musumba. Pa numa, Paulo alibweleele ku Antioke.

Mu mwaka wa 49 ninshi Yesu aliya kale ku muulu, Paulo alile na kabili mu kubila imbila nsuma mu ncende ishingi. Ilyo abwelelemo ku kumona aba bwananyina abaleikala ku Asia Minor, ailefika na ku  Bulaya. Aile na ku Atena, ku Efese, ku Filipi, ku Tesalonika, e lyo na ku ncende shimbi. Sila, Luka, no mulumendo uo baleita ati Timote baile na Paulo. Balibombeele pamo ukupanga ifilonganino ifipya kabili baleyafwa na ba mu filonganino ukuba abakosa mu fya kwa Lesa. Paulo alikelepo mu Korinti pa mwaka umo ne myeshi 6 pa kuti akoshe aba bwananyina aba mu Korinti. Paulo alebila imbila nsuma, alesambilisha, e lyo alelemba na makalata ku filonganino. Alepanga na matenti. Mu kupita kwa nshita, Paulo alibwelelemo ku Antioke.

Mu mwaka wa 52 ninshi Yesu aliya kale ku muulu, Paulo aile mu kushimikila abantu imbila nsuma pa muku walenga butatu, atendekele ku Asia Minor, afika na ku Filipi e lyo aya na ku Korinti. Paulo alikele mu Efese pa myaka iingi, alesambilisha abantu, aleundapa abalwele, kabili aleyafwa ne cilonganino. Na kabili alelanda na malyashi ku bantu abengi cila bushiku mu masukulu. Abantu abengi balekutika kabili balilekele ukucita ifyabipa ifyo balecita. Pa numa ya kubila imbila nsuma mu fyalo ifingi, Paulo aile ku Yerusalemu.