Rasul-rasul ngikutken perentah Jesus guna mberitaken berita si meriah ku sebelang doni. Bas tahun 47 M, turang senina i Antiokia ngutus Paulus ras Barnabas guna erberita ku daerah-daerah si ndauh. Dua perberita si ergiah-giah e pe erberita ku sebelang Asia Kecil, termasuk daerah Derbe, Listera, ras Ikoni.

Paulus ras Barnabas erberita ku kerina jelma, la soal kalak bayak, si mesera, si nguda, bage pe si metua. Melala kalak si nggit megiken berita kerna Jesus. Sanga Paulus ras Barnabas erberita man gubernur kota Kiprus, eme Sergius Paulus, lit perbegu si erusaha mpengadi dahin kalak e. Nina Paulus man perbegu e, ‘Jahwe si ngelawan kam.’ Perbegu e pe rempet buta. Ngidah kejadin e, gubernur ndai pe mis jadi kalak si tek.

Paulus ras Barnabas erberita ku kerina ingan, arah rumah ku rumah, bas pajak, bas dalan, ras rumah-rumah pertoton. Sanga kalak e mpepalem kalak si lumpuh i Listera, melala kalak si ngidah erpengakap maka kalak e duana dibata si man sembahen. Tapi nina Paulus ras Barnabas, ‘Ula bage! Dibatalah sembah kena! Kami pe manusia nge.’ Kenca si e, lit ka kalak Jahudi si manas-manasi kalak gelah munuh Paulus. Dungna, ibenteri kalak Paulus alu batu janah isaren ku darat kota, nce ipediat je gelah mate. Tapi, Paulus la mate! La ndekah kenca si e, turang senina reh nelamatken Paulus ras maba ia mulih ku kota. Dungna, Paulus mulih ku Antiokia.

Bas tahun 49 M, erberita ka Paulus ku ingan-ingan si ndauh. Kenca idahina turang senina si lit i Asia Kecil, lawes ia erberita ku ingan si terdauhen seh ku Eropa. Seh ia ku Aten, Epesus, Pilipi, Tesalonika, ras daerah si debanna. Ikut ka Silas, Lukas, ras sekalak anak perana, eme Timotius. Iban kalak enda me perpulungen-perpulungen janah ipegegehina gelah tetap paguh. Sada setengah tahun Paulus tading i Korinti. I je, ipegegehina turang seninana. Erberita ia, ngajar, ras nulis surat man melala perpulungen. Dahinna jadi tukang tenda. Dungna, mulih Paulus ku Antiokia.

Nce, bas tahun 52 M, imulai Paulus ka perdalanenna si peteluken, mulai arah Asia Kecil seh ku Pilipi si lit i utara ras Korinti i selatan. Piga-piga tahun dekahna Paulus ngajar, mpepalem, ras nampati runggun i Epesus. Tiap wari, ngajar ia i lebe-lebe jelma si enterem bas aula sekolah. Melala kalak si nggit megiken ras nggit robah. Dungna, kenca Paulus erberita si meriah ku erbage daerah, mulih ka ia ku Jerusalem.