Gisunod sa mga apostoles ang sugo ni Jesus nga isangyaw ang maayong balita sa tibuok yuta. Niadtong 47 C.E., ang mga tinun-an sa Antioquia nagpadala kang Pablo ug Bernabe aron mosangyaw sa ubang lugar. Kugihan kaayo silang duha nga nagsangyaw sa tibuok Asia Minor. Apil sa ilang giadto ang Derbe, Listra, ug Iconio.

Gisangyawan ni Pablo ug Bernabe ang tanang tawo, dato man o pobre, bata o tigulang. Daghan ang midawat sa kamatuoran bahin kang Kristo. Dihang gisangyawan ni Pablo ug Bernabe si Sergio Paulo nga gobernador sa Cipro, gipugngan sila sa usa ka madyikero. Giingnan ni Pablo ang madyikero: ‘Kaaway ka ni Jehova.’ Dihadiha, nabuta ang madyikero. Dihang nakita kini ni Gobernador Paulo, midawat siya sa kamatuoran.

Si Pablo ug Bernabe nagsangyaw sa tanang lugar, sa mga balay, merkado, dalan, ug mga sinagoga. Didto sa Listra, giayo nila ang tawong dili makalakaw maong nagtuo ang mga nakakita nga mga diyos sila. Gusto na nuon silang simbahon sa mga tawo. Pero giingnan sila ni Pablo ug Bernabe: ‘Ang Diyos lang ang simbaha! Mga tawo ra mi.’ Dayon dihay miabot nga mga Hudiyo ug ilang giimpluwensiyahan ang mga tawo nga kontrahon si Pablo. Ilang gibato si Pablo, giguyod pagawas sa siyudad, ug gibiyaan kay abi nilag patay na siya. Pero buhi pa siya! Miabot dayon ang mga tinun-an aron tabangan siya ug dad-on balik sa siyudad. Sa ulahi, mibalik si Pablo sa Antioquia.

Sa 49 C.E., mibiyahe na pod si Pablo aron mosangyaw sa laing lugar. Human mabisita ang mga tinun-an sa Asia Minor, misangyaw siya  sa mas layong lugar, didto sa Europe. Misangyaw siya sa Atenas, Efeso, Filipos, Tesalonica, ug sa uban pang dapit. Miuban niya si Silas, Lucas, ug ang batan-ong si Timoteo. Nagtinabangay sila sa pagtukod ug pagpalig-on sa mga kongregasyon. Mipuyo si Pablo ug usa ka tuig ug tunga sa Corinto para palig-onon ang mga tinun-an didto. Siya nagsangyaw, nagtudlo, ug nagpadalag mga sulat sa mga kongregasyon. Nagtrabaho sab siya ingong tighimog tolda. Sa ulahi, mibalik si Pablo sa Antioquia.

Pagka-52 C.E., mibiyahe si Pablo sa ikatulong higayon aron mosangyaw. Gikan sa Asia Minor, mipadulong siya sa Filipos, ug dayon sa Corinto. Daghang tuig nga nagpabilin si Pablo sa Efeso, nga nagtudlo, nag-ayo, ug nagtabang sa kongregasyon. Kada adlaw sab siya nagpakigpulong sa awditoryum sa usa ka eskuylahan. Daghan ang naminaw ug nagbag-o. Human niya masangyaw ang maayong balita sa daghang lugar, miadto si Pablo sa Jerusalem.