Bann zapot ti obei lord Zezi pour anons sa bon nouvel partou lo later. Lannen 47, bann frer Antyos ti anvoy Pol ek Barabas pour al prese dan diferan rezyon. Sa de predikater devoue ti vwayaze pour al prese Derb, Lis ek Ikonyonm.

Pol ek Barnabas ti pres avek tou dimoun, ris konman pov, zenn konman vye. Bokou dimoun ti aksepte laverite lo Kris. Ler Pol ek Barnabas ti pres avek Serzis Polous, gouverner Sip, en sorsye ti esey anpes zot koz avek sa msye. Pol ti dir sa sorsye: “Zeova pou pini ou.” Deswit sa sorsye ti vin aveg. Ler Gouverner Serzis Polous ti vwar sa, i ti vin en Kretyen.

Pol ek Barnabas ti anons sa bon nouvel partou kote, kazankaz, dan bazar lo semen e dan sinagog. Ler zot ti geri en zonm ki bwete Lis, bann ki ti vwar sa mirak ti krwar ki zot ti bann bondye e zot ti anvi ador Pol ek Barnabas. Me Pol ek Barnabas pa ti oule ki sa bann dimoun i fer sa. Zot ti dir: ‘Ador zis Bondye! Nou, nou zis bann zonm.’ Me apre sa, serten Zwif ti vini e zot ti fer lafoul vir kont Pol. Lafoul ti saboul li avek ros, trenn li an deor lavil e zot ti krwar ki zot ti’n touy li. Me Pol ti ankor vivan. Deswit bann frer ti vin ed li e anmenn li dan lavil. Pli tar, Pol ti retourn Antyos.

Lannen 49, Pol ti fer en lot vwayaz pour al prese dan diferan rezyon. Apre ki i ti retournen pour al vwar son bann frer Lazi Miner, Pol ti anons sa bon nouvel pli lwen ankor, dan Lerop. I ti al Atenn, Efez, Filip, Tesalonik ek lezot landrwa. Silas, Lik ek en  zenn onm ki apel Timote ti al avek Pol lo sa vwayaz. Zot ti travay ansanm pour form bann nouvo kongregasyon e ed bann frer ek ser vin pli for. Pol ti reste dan lavil Korent pour enn an edmi pour ankouraz bann frer ek ser laba. I ti prese, ansennyen e ekri bann let pour bokou kongregasyon. I ti osi travay pour fer latant. Avek letan, Pol ti retourn Antyos.

Pli tar, lannen 52 Pol ti fer en trwazyenm vwayaz predikasyon. I ti konmans sa vwayaz Lazi Miner, i ti al prese dan nor ziska dan lavil Filip e apre i ti desann Korent. Pol ti pas detrwa lannen Efez pour ansenny bann dimoun, geri bann malad e ed kongregasyon. I ti osi fer bann diskour piblik toulezour kot en lekol. Bokou dimoun ti ekoute e sanz zot lavi. Finalman, apre ki zot ti’n pres sa bon nouvel dan bokou landrwa, Pol ti al Zerizalenm.