WASE 98
Tete na iVakavuvuli vaKarisito ina Veimatanitu
Eratou muria na yapositolo na ivakaro i Jisu me ratou vunautaka na itukutuku vinaka ina veiyasa i vuravura. Ena rauta na yabaki 47 G.V., era talai Paula kei Panapasa na mataveitacini e Anitioki ena dua na ilakolako vakavunau. Erau lako na dauvunau gumatua qo ina veivanua kece e Esia Lailai me vakataki Tapi, Lisitira kei Ikoniona.
Erau vunau vei ira na tamata kece, ira na vutuniyau kei na dravudravua, qase kei na gone. Levu era taleitaka na itukutuku kei Karisito. A via tarovi rau e dua na dauvakatevoro ni rau vunau vei Serikiu Paula na kovana kei Saipurusi. E qai tukuna vua o Paula: ‘E cudruvi iko o Jiova.’ E mani mataboko vakasauri na dauvakatevoro. Ni raica qori na kovana, e vakabauta sara.
Erau vunau ena veivanua o Paula kei Panapasa, e veivale, makete, gaunisala, kei na valenilotu. Nira raica e Lisitira nodrau vakabula e dua na tagane lokiloki, era nanuma ni rau kalou ra qai via sokalou vei rau. Erau mani tarovi ira ni rau kaya: ‘Moni qarava ga na Kalou! Keirau tamata ga.’ Ia era uqeti ira na ilala qo eso na Jiu mera saqati Paula. Era vakaviriki koya ena vatu, era yarataki koya ina taudaku ni koro ra qai biuti koya tu e kea, ia a sega ni mate! Sega ni bera nira gole mai na mataveitacini mera kauti koya lesu ina koro. E qai biubiu o Paula me lesu i Anitioki.
Ena yabaki 49 G.V., e gole tale o Paula ena dua na ilakolako vakavunau. E lako vei ira na mataveitacini e Esia Lailai, oti e gole sara vakayawa me lai vunau e Urope. E lako i Aceni, Filipai, Efeso, e Cesalonaika kei na veivanua tale eso. Eratou tomani Paula o Sailasa, Luke, kei na cauravou o Timoci. Eratou tauyavutaka e levu na ivavakoso, ra vakaukauataki tale ga e levu. E tiko ga o Paula e Korinica me dua veimama na yabaki me vakaukauataki ira na mataveitacini. E vunau, veivakavulici, e volavola tale ga ina levu na ivavakoso. E dau cula valelaca o Paula me rawa ni qaravi koya ga. Toso na gauna, e lesu i Anitioki.
E qai gole o Paula ena ikatolu ni nona ilakolako vakavunau ena yabaki 52 G.V., e tekivu mai Esia Lailai. E gole cake sara i Filipai, oti e gole sobu i Korinica. E lai vica toka na yabaki o Paula e Efeso, e veivakavulici, veivakabulai, e veivuke tale ga ena ivavakoso. E dau vunau e veisiga ena dua na valenisoqo ni koronivuli. Levu era veisau nira rogoci koya. Oti nona vunau mai na veivanua sa qai gole i Jerusalemi.
“O koya gona, ni lako moni vakavulici ira na lewe ni veivanua kece ga mera tisaipeli.”—Maciu 28:19
Rawa ni o Wilika Tale ga
YACA ENA IVOLATABU
Qito Vakaivolatabu me Baleti Paula
Cava e cakava o Paula me vukei koya ena nona cakacaka vakaitalatala? Raica na kena isau ena qito vakaivolatabu qo.
SA VEILIUTAKI NA MATANITU NI KALOU!
Vunautaki na Matanitu ni Kalou—Vunautaki na iTukutuku Vinaka e Vuravura Raraba
E parofisaitaka o Jisu ni na vakatubuqoroqoro na ivakatagedegede ni cakacaka vakavunau ena iotioti ni veisiga. Sa vakayacori vakacava nona parofisai?
