D Aposchtel mached das, wo Jesus ihne gseit het: Si prediged di gueti Botschaft uf de ganze Welt. Im Jahr 47 verabschieded sich de Paulus und de Barnabas vo de Brüedere z Antiochia und göhnd uf e Predigtreis. Si reised dur Chlii-Asie, das isch hüt i de Türkei, und prediged ganz iifrig a verschidene Ort wie z Derbe, z Lystra und z Ikonion.

De Paulus und de Barnabas prediged allne, egal öb si arm oder riich, alt oder jung sind. Ganz vil chömmed i d Wahrheit. Uf Zypere prediged si em Statthalter Sergius Paulus, das isch de höchschti Maa i dere Region. En Zauberer wett si stoppe, de Paulus seit ihm aber: «Jehova wird dich bestrafe!» Da wird de Zauberer grad blind. Wo de Statthalter das gseht, wird er en Jünger vo Jesus.

De Paulus und de Barnabas prediged überall: uf em Määrt, uf de Strass, i de Synagoge und vo Huus zu Huus. Z Lystra heiled si einisch en Maa, wo nid cha laufe. D Lüt, wo das gsehnd, denked, si seiged Götter, und wend si grad abete. De Paulus und de Barnabas wehred sich aber degäge und säged: «Mir sind au nur Mensche. Beted Gott a!» Denn chömmed Jude us andere Städt und hetzed d Lüt gege de Paulus uf. Si schiessed mit Stei uf ihn und schleipfed ihn us de Stadt. Si lönd ihn eifach la lige, wil si meined, er seig tot. Aber de Paulus lebt no. D Brüedere chömmed sofort, helfed ihm und bringed ihn zrugg i d Stadt. Später gaht de Paulus wider uf Antiochia.

Im Jahr 49 macht de Paulus di zweiti Predigtreis. Zerscht gaht er zu de Brüedere uf Chlii-Asie. Sini Reis gaht denn wiiter uf Europa, wil er au dört wett di gueti Botschaft predige. Er bsuecht dört Städt wie Philippi, Thessalonich, Athen und anderi Ort. De Silas, de Lukas und en junge Maa, wo Timotheus heisst, begleited ihn. Zäme gründed si neui Versammlige und helfed ihne, im Glaube starch z werde. Anderhalb Jahr lang bliibt de Paulus z Korinth und motiviert dört d Brüedere. Er prediget, lehrt und schribt Briefe a verschideni Versammlige. Er schaffet au no als Zeltmacher. Nachere gwüsse Ziit reist de Paulus über Ephesus zrugg uf Antiochia.

Im Jahr 52 macht de Paulus di dritti Predigtreis. Zerscht gaht er uf Chlii-Asie. Es paar Jahr isch er denn z Ephesus, wo er d Lüt lehrt, heilt und de Versammlig dört hilft. Au inere Schuel het er jede Tag en Vortrag. Vil losed zue und ändered ihres Lebe. Später reist de Paulus i Norde bis uf Philippi und nachher i Süüde bis uf Korinth. Er het di gueti Botschaft i vilne Länder prediget und jetzt gaht er no uf Jerusalem.