Umi apóstol ojapo la Jesús onkarga vaʼekue chupekuéra ha opredika oparupiete ko yvy ape ári umi notísia porã oñeʼẽva Ñandejárare. Áño 47-pe, umi ermáno Antioquiagua omondo Pablo ha Bernabépe ojapo hag̃ua peteĩ viáhe de predikasión. Mokõivévante kyreʼỹme opredika oviaha aja Asia Menor tuichakuére, por ehémplo Derbe, Listra ha Icóniope.

Pablo ha Bernabé opredika vaʼekue opaichagua persónape, tahaʼe iplátava térã imboriahúvape, imitãva ha ijedávape. Péicha rupi heta persóna oñepyrũ ojerovia Jesúsre. Pablo ha Bernabé opredika vaʼekue Sergio Páulope, haʼéva governadór Chíprepe. Upérõ peteĩ pajeséro ojokosemoʼã chupekuéra, péro Pablo heʼi chupe: “Jehová ndekastigáta”. Upepete pe pajeséro opyta siégo. Pe governadór Sergio Paulo ohechávo la oikóva ojerovia avei Jesúsre.

Pablo ha Bernabé opredika vaʼekue opárupi, tahaʼe ogahárupi, umi merkádope, umi tapére ha sinagógape. Peteĩ jey, Lístrape omonguera hikuái peteĩ paralítikope ha umi hénte ohechávo la oikóva oimoʼã haʼekuéra haʼeha dios ha oadoraséma chupekuéra. Péro Pablo ha Bernabé ndohejái umi héntepe ojapo upéva, síno heʼi chupekuéra: “Ñandejárape añoite peadora vaʼerã. Ore ningo yvypóra reínte”. Upéi ou unos kuánto judío omboliga umi héntepe opuʼã hag̃ua Páblore, haʼekuéra ohendu umi judíope ha oñepyrũ ojapi hikuái Páblope itápe ha ombotyryry onohẽ chupe hikuái pe siudágui oimoʼãgui omanomaha. Péro Pablo nomanói kuri. Ensegída unos kuánto ermáno ou oipytyvõ chupe ha omoinge jey chupe pe siudápe. Upéi Pablo oho jey Antioquíape.

Áño 49-pe, Pablo ojapo jey peteĩ viáhe ha ovisita umi ermáno oĩvape Asia Menor tuichakuére ha avei oho opredika umi notísia porã oñeʼẽva Ñandejárare Europa peve. Pablo oho Aténaspe, Éfesope, Filípospe,  Tesalónicape ha hetave lugárpe. Upe iviáhepe omoirũ chupe Silas, Lucas ha peteĩ mitãkariaʼy hérava Timoteo. Haʼekuéra ombaʼapo oñondive oforma hag̃ua kongregasión pyahu ha oipytyvõ hag̃ua umi ermánope ojerovia mbarete hag̃ua. Pablo oho vaʼekue avei Coríntope ha un áño imédio opyta upépe oipytyvõ hag̃ua umi ermánope ojerovia mbareteve hag̃ua. Pablo opredika, oporomboʼe ha oskrivi avei kárta oguerahaka hag̃ua heta kongregasiónpe. Haʼe ojapo ha ovende vaʼekue óga kárpa ikatu hag̃uáicha oñemantene. Tiémpo rire, Pablo oho jey Antioquíape.

Áño 52-pe Pablo ojapo pe tercer viáhe. Ñepyrũrã oho opredika umi siuda oĩvape Asia Menórpe. Upéi oho nórte gotyo Filipos peve ha upéi oho sur gotyo Corinto peve. Pablo opyta vaʼekue avei heta áñore Éfesope, upépe haʼe oporomboʼe, oporomonguera ha oipytyvõ pe kongregasiónpe. Káda día ojapómi vaʼekue avei diskúrso peteĩ eskuélape ha heta hénte ohendúva Páblope okambia. Opredika rire heta lugárpe umi notísia porã oñeʼẽva Ñandejárare, Pablo oho Jerusalénpe.