Apọsteli lẹ setonuna gbedide Jesu tọn nado hẹn wẹndagbe lọ gbayipe gbọn aigba lẹpo ji. To owhe 47 W.M., mẹmẹsunnu he to Antioku lẹ do Paulu po Balnaba po hlan nado yì dọyẹwheho lẹdo pé. Yẹwhehodọtọ zohunhunnọ awe ehelẹ zingbejizọnlin lẹdo Asia Pẹvi yì lẹdo delẹ mẹ taidi Delbe, Listla po Ikonioni po.

Paulu po Balnaba po dọyẹwheho na mẹlẹpo, yèdọ akuẹnọ po wamọnọ po, yọpọvu po mẹho po. Mẹsusu kẹalọyi nugbo lọ gando Klisti go. Whenue Paulu po Balnaba po dọyẹwheho na ayimatẹn-gán Kiplu tọn he nọ yin Sọlgiu Paulu, bojlẹtọ de tẹnpọn nado hẹnalọdotena yé. Paulu gblọnna bojlẹtọ lọ dọmọ: ‘Jehovah gblewhẹdo we.’ To afọdopolọji, bojlẹtọ lọ lẹzun nukuntọ́nnọ. To whenue Ayimatẹn-gán Paulu mọ ehe, e lẹzun yisenọ.

Paulu po Balnaba po dọyẹwheho gbọn filẹpo, sọn whédegbè jẹ whédegbè, to ahi lẹ mẹ, alihogbó lẹ ji podọ sinagọgu lẹ mẹ. Whenue yé gbọazọ̀nna dawe sẹkunọ de to Listla, mẹhe mọ azọ́njiawu lọ lẹ yí yé do mọ yẹwhe lẹ bo tẹnpọn nado sẹ̀n yé. Amọ́, Paulu po Balnaba po gbẹ́ bo dọmọ: ‘Jiwheyẹwhe kẹdẹ wẹ mì dona nọ sẹ̀n! Gbẹtọ tata wẹ míwlẹ.’ Enẹgodo, Ju delẹ wá bo hẹn gbẹtọgun lọ nado diọnukunsọ Paulu. Yé sọ dlan zannu do e bo dọ̀n ẹn tọ́njẹgbonu tòdaho lọ tọn bosọ jo e do finẹ, po linlẹn lọ po dọ e ko kú. Amọ́, Paulu gbẹ́ pò togbẹ̀! Mẹmẹsunnu lẹ wá whlẹn ẹn bo plan ẹn lẹkọyi tòdaho lọ mẹ. To godo mẹ, Paulu lẹkọyi Antioku.

To owhe 49 W.M., Paulu sọ zingbejizọnlin devo nado dọyẹwheho. To whenue e ko lẹkọyi pọ́n mẹmẹsunnu he to Asia Pẹvi lẹ godo, e hẹn  wẹndagbe lọ yì fihe sọ dẹn humọ, yèdọ Europe. E yì Atẹni, Efesu, Filipi, Tẹsalonika po fidevo lẹ po. Sila, Luku po dẹpẹ de he nọ yin Timoti po zọnhẹ Paulu to gbejizọnlin etọn whenu. Yé wazọ́n dopọ hẹ ẹ nado do agun lẹ ai bo hẹn yé lodo. Paulu gbọṣi Kọlinti na owhe dopo daa bo to mẹmẹsunnu lẹ hẹn lodo. E dọyẹwheho bo plọnmẹ bosọ kanwehlan agun susu. E sọ nọ wazọ́n gòhọ gbigbá tọn. To nukọn mẹ, Paulu wá lẹkọyi Antioku.

To godo mẹ, to owhe 52 W.M., Paulu bẹ gbejizọnlin atọ̀ntọ de jẹeji sọn Asia Pẹvi. E zingbejizọnlin yì agewaji kakajẹ Filipi, enẹgodo e jẹte wá Kọlinti. Paulu yí owhe susu zan to Efesu nado plọnmẹ, hẹnazọ̀ngbọnamẹ bosọ gọalọna agun he to finẹ. E sọ nọ na hodidọ gbangba tọn lẹ egbesọegbesọ to wehọmẹ de. Mẹsusu wẹ dotoaina ẹn bo diọ jijọ. Whenue Paulu ko lá wẹndagbe lọ to otò susu mẹ godo, e wá yì Jelusalẹm.