Apot yo te obeyi lòd Jezi te bay pou yo gaye bon nouvèl la sou tout tè a. Nan ane 47 epòk nou an, frè Antyòch yo te voye Pòl ak Banabas nan yon kanpay predikasyon. De pwoklamatè zele sa yo te vwayaje nan tout Azi Minè, yo t al yon seri kote tankou Dèbe, Lis ak Ikónyòm.

Pòl ak Banabas te preche tout moun, rich kou pòv, timoun kou granmoun. Anpil moun te aksepte laverite sou Jezi, Kris la. Lè Pòl ak Banabas t ap preche Sèjiyis Polis, gouvènè peyi Chip la, yon majisyen te eseye anpeche yo. Pòl di majisyen an: ‘Jewova ap pini w.’ Menm kote a majisyen an vin avèg. Lè gouvènè Polis wè sa, li vin kretyen.

Pòl ak Banabas te preche tout kote, kay an kay, nan mache, nan lari ak nan sinagòg. Yo te geri yon mesye ki te bwete nan pye nan Lis. Lè moun yo wè sa, yo te panse se dye mesye yo te ye e yo t ap chèche adore yo. Men, Pòl ak Banabas fè yo sispann, yo te di yo: ‘Se Bondye sèlman pou nou adore! Se moun nou ye sèlman.’ Lè sa a gen yon seri Juif ki vini e ki monte tèt foul la kont Pòl. Foul la kalonnen l ak kout wòch, yo rale l met deyò vil la e yo kite l atè kòmsi l te mouri. Men, Pòl te vivan toujou! Lapoula, frè yo vin ede l e yo mennen l nan vil la. Annapre, Pòl retounen Antyòch.

Nan ane 49 epòk nou an, Pòl te ale nan yon lòt kanpay predikasyon. Apre l fin vizite frè nan Azi Minè yo, li pote bon nouvèl la pi lwen toujou, anpalan de Ewòp. Li t ale Atèn, Efèz,  Filip, Tesalonik ak lòt kote ankò. Silas, Lik ak yon jèn gason ki rele Timote te ale ak Pòl nan vwayaj la. Yo te travay ansanm pou gen plis kongregasyon e yo te ede kongregasyon yo vin djanm. Pòl te rete Korent pandan ennan edmi pou l fòtifye frè yo. Li te preche, li te anseye e li te ekri lèt pou anpil kongregasyon. Mete sou sa, li te konn fè tant. Rive yon lè, Pòl retounen Antyòch.

Annapre, nan ane 52 epòk nou an, Pòl te fè yon twazyèm kanpay predikasyon, li te kòmanse nan Azi Minè. Li te vwayaje byen lwen nan direksyon nò, li te rive jis Filip apre sa li desann Korent. Pòl te pase plizyè ane nan Efèz kote l te anseye nan kongregasyon an, li te konn geri moun ladan l e l te ede l. Mete sou sa, li te fè diskou chak jou nan oditoryòm yon lekòl. Anpil moun te koute e yo te chanje fason yo t ap viv. Alafen, apre Pòl te fin preche bon nouvèl la nan anpil peyi, li t al Jerizalèm.