Ovaapostele va raisa onḓuviro kerakiza raJesus rokuzuvarisa ombuze ombwa mouye auhe. Mombura ndji 47 O.Z., ovarumendu ovakambure moAntiokie va hinda Paulus na Barnabas mouyenda wokukazuvarisa. Ovazuvarise 2 omapatje mba, va kayenda mehi raAsie arihe kotuveze tjimuna oDerbe, oListra noIkonium.

Paulus na Barnabas va zuvarisira ovandu avehe, ovatumbe novasyona, ovanene novaṱiṱi. Ovandu ovengi va yakura ouatjiri ohunga na Kristus. Indu Paulus na Barnabas tjaave zuvarisire omuhonapare waSiprus, wena Sergius Paulus, ondjai ya kondjisa okuvetjaera. Paulus wa raera kondjai na tja: ‘Muhona me ku vere.’ Nu tjimanga ondjai ya poṱupara. Omuhonapare Paulus tja muna otjiṋa hi, eye wa rira omukambure.

Paulus na Barnabas va zuvarisa ombuze koṋa akuhe, okuza kondjuwo nga kondjuwo, potuveze twomarandero, mondjira na mozondjuwo zomawongarero wombongo. Indu tji va verura omurumendu omuremane moListra, imba mba muna otjihimise hi aave ripura kutja owo oomukuru, nu va kondjisa okurikotamena ku wo. Posiya Paulus na Barnabas ve ve tjaera nave tja: ‘Rikotameneye ku Ndjambi! Eṱe oweṱe ovandu tjimuna eṋe.’ Okuzambo Ovajuda tjiva ve ya nave tjiti kutja otjimbumba tjovandu tji pirukire Paulus. Otjo tja veta Paulus nomawe atji mu nanene pendje yotjihuro natji mu esa mbo kutja ma ṱe. Posiya Paulus ngunda wa ri nomuinyo! Tjimanga ovakambure ovakwao ve ya ave yekumuyama okuzambo ave mu yarura motjihuro. Kombunda Paulus wa yaruka koAntiokie.

Mombura ndji 49 O.Z., Paulus wa ya mouyenda warwe. Tja za nokukotoka okuyekutara ovakambure ovakwao moAsie, eye wa twara  ombuze ombwa kotuveze twokokure moEuropa. Eye wa ya koAtene, Efesus, Filipi, Tesalonika na kotuveze twarwe. Silas na Lukas nomutanda wena Timoteus va ya puna Paulus mouyenda we. Owo va ungura pamwe okuuta ozombongo nokuzevatera kutja ze hare omasa. Paulus nandarire wa kara moKorinte oure wombura ombomba nohinga, okuyandja omasa kovakambure ovakwao. Eye wa zuvarisa nokuhonga nu wina wa tjanga otutuu kozombongo ozengi. Eye wina aa ungura ozotenda. Oruveze tjaaru kayenda, Paulus wa yaruka koAntiokie.

Kombunda mombura ndji 52 O.Z., Paulus wa ya mouyenda we outjatatu, mbwa utira moAsie. Eye wa ya kuṱa komanene nga koFilipi okuzambo ai koKorinte. Paulus wa kara ozombura ozonḓiṱi moEfesus, ama hongo, nokuverura ovandu nokuvatera ombongo. Eye wina aa yandja omahungi eyuva arihe mondjuwo maamu wongarere ovandu. Ovandu ovengi va puratena nave rundurura ongaro yawo. Korusenina Paulus tja za nokuzuvarisa ombuze ombwa momahi omengi, eye wa ya koJerusalem.