Nagtulnog dagiti apostol iti bilin ni Jesus nga ikasabada ti naimbag a damag iti intero a daga. Idi 47 C.E., imbaon dagiti kakabsat idiay Antioquia da Pablo ken Bernabe a mangasaba iti nadumaduma a lugar. Napanda kadagiti lugar iti Asia Menor, kas iti Derbe, Listra, ken Iconio.

Kinasabaan da Pablo ken Bernabe ti amin, nabaknang man wenno marigrigat, ubing man wenno nataengan. Adu ti immawat iti kinapudno maipapan ken Kristo. Idi kinasabaan da Pablo ken Bernabe ti gobernador ti Chipre a ni Sergio Paulo, kayat ida a pasardengen ti maysa a mangkukulam. Imbaga ni Pablo iti mangkukulam: ‘Kabusornaka ni Jehova.’ Bigla a nagbalin a bulsek ti mangkukulam. Idi nakita dayta ni Gobernador Paulo, nagbalin a manamati.

Nangasaba da Pablo ken Bernabe kadagiti balay, paglakuan, kalsada, sinagoga, ken dadduma pay. Idi pinaimbagda ti maysa a lalaki a pilay idiay Listra, pinanunot dagiti nakakita iti dayta nga isuda ket dios isu a kayatda ida a dayawen. Ngem pinasardeng ida da Pablo ken Bernabe. Kinunada: ‘Agdayawkay laeng iti Dios! Taokami laeng.’ Idi kuan, adda dagiti simmangpet a Judio ket kinombinsirda dagiti tattao a busorenda ni Pablo. Inuborda ni Pablo, inulodda nga inruar iti siudad, ken pinanawanda ta impagarupda a natayen. Ngem sibibiag ni Pablo! Dagus a tinulongan isuna dagiti kakabsat ket insublida iti siudad. Idi agangay, nagsubli ni Pablo idiay Antioquia.

Idi 49 C.E., nagbibiahe manen ni Pablo iti nagduduma a lugar tapno mangasaba. Kalpasan a binisitana dagiti kakabsat iti Asia Menor,  napan nangasaba idiay Europa. Napan idiay Atenas, Efeso, Filipos, Tesalonica, ken dadduma pay. Kaduana da Silas, Lucas, ken ti agtutubo a ni Timoteo. Nagtitinnulongda a mangbukel kadagiti kongregasion ken pinabilegda dagiti kakabsat. Nagyan ni Pablo idiay Corinto iti maysa ket kagudua a tawen tapno paregtaenna dagiti kakabsat. Nangasaba, nangisuro, ken nagsurat iti adu a kongregasion. Nagtrabaho met kas agar-aramid iti tolda. Idi agangay, nagsubli ni Pablo idiay Antioquia.

Idi 52 C.E., nagbibiahe manen ni Pablo iti adu a lugar tapno mangasaba. Idiay Asia Menor ti nangrugianna. Nagpaamianan agingga idiay Filipos ken nagpaabagatan agingga idiay Corinto. Nagyan ni Pablo iti sumagmamano a tawen idiay Efeso. Nangisuro, nangpaimbag, ken timmulong iti kongregasion sadiay. Inaldaw met a nagpalpalawag iti maysa a pagtataripnongan iti eskuelaan. Adu a tao ti dimngeg ken nagbalbaliw. Idi agangay, kalpasan nga inkaskasabana ti naimbag a damag iti adu a lugar, napan idiay Jerusalem.