Mungkan ting kabu gara shiga chyam bra hkra galaw u, ngu ai Yesu a lam matsun hpe kasa ni hkan sa ma ai. A.D. 47 hta, Antioki mare kaw na hpunau ni gaw, Pawlu yan Barnaba hpe bu hkawm nna hkaw tsun na matu lit jaw ai. Dai myit rawt ai hkaw tsun masha lahkawng gaw, Asha Maina (Ya aten hta Turiki mungdan) kaw na mare ni re ai Derbe, Lustra, Ikoni hte kaga mare ni de bu hkawm ma ai.

Pawlu yan Barnaba gaw masha shagu hpe hkaw tsun ai. Dai hta matsan, lusu, asak kaji kaba yawng lawm ai. Masha law law gaw Hkristu hte seng ai teng man ai lam hpe hkap la ma ai. Pawlu yan Barnaba gaw Kupru zunlawng munggyi Sergi Pawlu hpe hkaw tsun ai shaloi, mandan lakle sara langai gaw n hkaw tsun na matu pat shingdang wa ai. Pawlu gaw lakle sara hpe ndai hku tsun ai: ‘Yehowa nang hpe ari jaw na re.’ Dai hku tsun ngut ai hte kalang ta, lakle sara gaw myi n mu mat ai. Dai mabyin hpe mu ai munggyi Pawlu gaw Hkristan langai byin wa ai.

Pawlu yan Barnaba gaw nta ni, gat ni, lam ni hte tara jawng ni hta sha n-ga, shara shagu hkan e mung hkaw tsun ma ai. Lustra mare kaw na, lam n lu hkawm ai masha langai hpe mung shamai ya ai. Dai mauhpa amu hpe mu ai masha ni gaw shan hpe hpara ni ngu shadu nna, nawku na matu shakut ai. Raitim, shan gaw: ‘Karai Kasang hpe sha nawku daw jau u! An gaw masha sha re’ nga nna tsun ai. Dai hpang, Yuda masha nkau mi du wa nna, Pawlu hpe nju wa hkra masha ni hpe sa gunglau ai. Dai majaw, masha hpawng gaw Pawlu hpe nlung hte kabai ma ai. Si sai ngu shadu ai majaw, mare shinggan de shi hpe garawt mat nna kabai da ai. Raitim, Pawlu n si ai. Shaloi, hpunau ni du wa nna, shi hpe mare kata de woi mat ai. Dai hpang, Pawlu gaw Antioki de wa mat ai.

A.D. 49 hta, Pawlu gaw kalang bai bu hkawm ai. Asha Maina kaw nga ai hpunau ni hpang de bai kawan ngut ai hpang, kabu gara shiga hpe grai tsan ai  Urawpa Dan du hkra sa hkaw tsun ai. Shi gaw Ahten, Ehpesu, Hpilipi, Htesaloni hte kaga shara hkan mung sa hkaw tsun ai. Sila, Luka hte ramma Timohti mung Pawlu hte arau hkan nang ai. Shanhte gaw nawku hpung ni hpawng de na matu hte hpunau ni hpe shangang shakang ya na matu karum ya ai. Pawlu gaw Korinhtu mare hta laning mi chyen nga nna, dai kaw nga ai hpunau ni hpe shangang shakang ya ai. Shi gaw hkaw tsun ai, sharin achyin ya ai hte nawku hpung law law hpang de mung laika ka ai. Sum chywi ai bungli mung galaw ai. Dai hpang, Antioki de wa mat ai.

A.D. 52 hta, Pawlu gaw masum lang ngu na sasana hkrun lam hpe Asha Maina kaw nna hpang ai. Shi gaw dingdung maga hta nga ai Hpilipi mare kaw nna, dingda maga hta nga ai Korinhtu mare du hkra bu hkawm ai. Pawlu gaw Ehpesu mare hta shaning law law nga wa ai. Dai kaw nga ai laman, sharin achyin ya ai, shamai shatsai ya ai hte nawku hpung hpe karum ya ai. Jawng gawknu hta mung shani shagu shawa mungga htawn ai. Masha law law gaw madat la nna, shanhte a prat galai shai wa ma ai. Shara law law hta kabu gara shiga hpe hkaw tsun ngut ai hpang, Pawlu gaw Yerusalem de wa mat ai.