Atũmwa nĩmaatĩĩie mwĩao wa Yesũ wa kũtavanyʼa ũvoo mũseo nthĩ yonthe. Mwakanĩ wa 47, ana-a-asa ala maĩ Andiokia nĩmatũmie Vaulo na Valanava mathi savalĩ ya mbee ya kũtavanyʼa. Atavanyʼa asu elĩ maĩ na kĩthito kingĩ nĩmaendie maitavanyʼa isionĩ syonthe ila syĩ Asia Nini. Isio isu maendie nĩ ta Ndelive, Lisitela, na Ikonio.

Vaulo na Valanava matavasya kĩla mũndũ, ethĩwe nĩ mũthwii kana nĩ ngya, nĩ wa mũika kana nĩ mũkũũ. Andũ aingĩ nĩmeetĩkĩlile ũwʼo ũla mataviwʼe ĩũlũ wa Klĩsto. Mũthenya ũmwe Vaulo na Valanava maitavya ngavana wa Kuvolo ũvoo mũseo, ve mũoi wendaa kũmasiĩĩa. Ngavana ũsu eetawa Selikio Vaulo. Yĩla Vaulo woonie mũoi ũsu ayĩka ũu, amwĩie atĩĩ: ‘Yeova ndekwendeewʼa o na vanini nĩ kĩla ũkwĩka.’ Ndatĩkanĩ o ĩsu, mũoi ũsu nĩwaekie kwona. Na ĩndĩ yĩla Ngavana Vaulo woonie ũndũ ũsu, nĩwatwʼĩkie mwĩtĩkĩli.

Vaulo na Valanava matavanasya kĩla vandũ. Nĩmatavanasya nyũmba kwa nyũmba, sokonĩ, nzĩanĩ, na masinakokenĩ. Me ndũanĩ ya Lisitela, nĩmavoisye mũndũ waĩ mwonzu maaũ, na andũ ala moonie kyama kĩu masũanĩa ta maĩ ngai na mambĩĩa kũmathaitha. Ĩndĩ Vaulo na Valanava mamasiĩĩa, na mamea: ‘Thaithai Ngai e weka. Ithyĩ twĩ o andũ.’ Maendeee kũtavanyʼa, ve Ayuti mookie na matuma ĩkomano yĩla yaĩ vau yĩmũthatĩa Vaulo mũno. Ĩkomano yĩu nĩyamũkimangie na mavia, na yamũkusũlanyʼa yamũtwaa nza wa ndũa, na yamũtia vau ĩyona ta ũkwie. Ĩndĩ Vaulo ndaĩ mũkwʼũ. Ndatĩkanĩ ĩsu, ana-a-asa nĩmookie mamũtetheesya na mamũtũnga ndũanĩ. Ĩtina Vaulo nĩwasyokie ĩngĩ Andiokia.

Mwakanĩ wa 49, Vaulo nĩwavangie savalĩ ya kelĩ ya kũthi kũtavanyʼa. Savalĩnĩ ĩsu, nĩwaendie kwona ũndũ ana-a-asa ala maĩ Asia Nini maendeee na ĩndĩ athi kũtavanyʼa ũvoo mũseo Europe, ĩla yaĩ vaasa kuma vau.  Nĩwaendie Athene, Eveso, Vilivi, Thesalonika, na isionĩ ingĩ. Aendeee kũtavanyʼa isionĩ isu, Sila, Luka, na Timotheo, ũla waĩ wa mũika, nĩmookie kũtavanyʼa nake. Nĩmatetheanĩsye na Vaulo kwambĩĩsya ikundi na kũilũlũmĩĩlya. Vaulo nĩwekalile ndũanĩ ya Kolintho vandũ va mwaka ũmwe na nusu nĩ kana aendeee kũlũlũmĩĩlya ana-a-asa. E ndũanĩ ĩsu nĩwatavanasya, akamanyĩsya andũ, o na nĩwaandĩkĩie ikundi mbingĩ valũa. Vaulo athũkũmaa wĩa wa kũseũvya maeema e kũu. Ĩtina wa ĩvinda nĩwesie kũsyoka Andiokia.

Mwakanĩ wa 52, Vaulo nĩwavangie savalĩ ya katatũ ya kũthi kũtavanyʼa, na ambĩĩie kwĩka ũu kĩsionĩ kya Asia Nini. Nĩwaendie kĩsionĩ kyaĩ vaasa ngalĩko ya ĩũlũ kyeetawa Vilivi, na ĩndĩ athi Kolintho. Vaulo nĩwekalile myaka kauta Eveso, aitavanyʼa, aivosya andũ, na aitetheesya kĩkundi kĩla kyaĩ ndũanĩ ĩsu. O na nĩwatavasya andũ ũvoo mũseo mombanĩe nyũmbanĩ nene ya sukulu. Andũ aingĩ nĩmaalyũlile mwĩkalĩle woo ĩtina wa kwĩthukĩĩsya maũndũ ala Vaulo watavanasya. Mũthya, Vaulo nĩwasyokie Yelusaleme amina kũtavanyʼa ũvoo mũseo isionĩ mbingĩ.