Atũmwo nĩ maathĩkĩire watho wa Jesu wa kũhunjia ũhoro mwega thĩinĩ wa thĩ yothe. Mwaka wa 47 thutha wa Kristo, ariũ a Ithe witũ a Antiokia nĩ maatũmire Paulo na Baranaba mathiĩ makahunjie. Ahunjia acio erĩ nĩ maathiire icigo ciothe cia Asia Nini nginya kũndũ ta Deribe, Lusitera, na Ikonio.

Paulo na Baranaba maahunjagĩria andũ othe gũtekũmakania kana nĩ athĩni, itonga, andũ ethĩ, kana akũrũ. Andũ aingĩ nĩ meetĩkirie ũhoro wĩgiĩ Kristo. Rĩrĩa maahunjagĩria Serigio Paulo ũrĩa warĩ ngavana wa Kuporo, mũragũri ũmwe nĩ aageririe kũmagiria. Paulo eerire mũragũri ũcio ũũ: ‘Jehova nĩ egũgũũkĩrĩra.’ O rĩmwe mũragũri ũcio nĩ aatuĩkire mũtumumu. Thutha wa Ngavana Serigio Paulo kwĩyonera ũndũ ũcio, nĩ aatuĩkire mwĩtĩkia.

Paulo na Baranaba maahunjagia kũndũ guothe, mũciĩ kwa mũciĩ, thoko-inĩ, njĩra-inĩ, na thunagogi-inĩ. Rĩrĩa maahonirie mũndũ warĩ muonju itũũra-inĩ rĩa Lusitera, andũ arĩa meeyoneire meeciririe atĩ maarĩ ngai na makĩgeria kũmahoya. Paulo na Baranaba nĩ maamagiririe na makĩmeera ũũ: ‘Hoyai Ngai wiki! Ithuĩ tũrĩ o andũ.’ Thutha ũcio nĩ gwokire Ayahudi amwe na magĩtũma kĩrĩndĩ gĩũkĩrĩre Paulo na Baranaba. Kĩrĩndĩ nĩ kĩahũũrire Paulo na mahiga, gĩkĩmũkururia nginya nja wa itũũra, na gĩkĩmũtiga nĩguo akue. O na kũrĩ ũguo, Paulo ndaakuire! O hĩndĩ ĩyo ariũ a Ithe witũ nĩ maathiire makĩmũhonokia na makĩmũtwara itũũra rĩngĩ. Thutha ũcio Paulo nĩ aacokire Antiokia.

Mwaka-inĩ wa 49 thutha wa Kristo, Paulo nĩ aathiire rũgendo rũngĩ. Thutha wa gũcoka Asia Nini kũrĩ ariũ a Ithe witũ, nĩ aathiire kũhunjia ũhoro ũrĩa mwega kũndũ kũraihu mũno nginya Rũraya.  Aathiire Athene, Efeso, Filipi, Thesalonike, na kũndũ kũngĩ kũingĩ. Sila, Luka, na mũndũ ũngĩ mwĩthĩ wetagwo Timotheo nĩ maathiire na Paulo rũgendo-inĩ rũu rwake. Maarutire wĩra wa kwambĩrĩria ciũngano na gũciteithia igĩe na hinya. Paulo nĩ aaikarire Korintho kwa ihinda rĩa mwaka ũmwe na nuthu agĩkĩra ariũ a ithe witũ ngoro. Nĩ aahunjirie, akĩrutana, na akĩandĩkĩra ciũngano nyingĩ marũa. Ningĩ nĩ aarutaga wĩra wa gũthondeka hema. Thutha wa ihinda nĩ aacokire Antiokia.

Thutha-inĩ kũrĩ mwaka wa 52 thutha wa Kristo, Paulo nĩ aathiire iceera rĩake rĩa gatatũ, na aambĩrĩirie Asia Nini. Nĩ aathiire mwena wa rũgongo nginya o Filipi na agĩcoka agĩikũrũka nginya o Korintho. Paulo nĩ aaikarire mĩaka ĩigana ũna Efeso akĩrutana, akĩhonanagia, na agĩteithagĩrĩria kĩũngano. Ningĩ nĩ aarutaga mĩario ya andũ othe o mũthenya nyũmba-inĩ ĩmwe ya cukuru. Andũ aingĩ nĩ maamũthikĩrĩirie na magĩcenjia mĩtugo yao. Thutha wa kũhunjia ũhoro ũrĩa mwega mabũrũri-inĩ maingĩ, Paulo nĩ aacokire Jerusalemu.