တၢ်မၢဖိ​တဖၣ်​ဒိကနၣ်​ဝဲ ယ့ၣ်ၡူး​အ​တၢ်မၤလိာ်​လၢ က​ဘၣ်​စံၣ်တဲၤ​တဲလီၤ​ဝဲ​တၢ်သးခု​ကစီၣ်​လၢ ဟီၣ်ခိၣ်​ဒီဘ့ၣ်​န့ၣ်​လီၤ. ဖဲ ခ.န. ၄၇ နံၣ်​န့ၣ် ဒီပုၢ်ဝဲၢ်​တဖၣ်​လၢ အၣ်တံၤအီာ်​ဆှၢလီၤ စီၤ​ပီလူး​ဒီး​စီၤ​ဘၢ်နါဘၤ​လၢ က​လဲၤ​စံၣ်တဲၤ​တဲလီၤ​တၢ်​လၢ ထံကီၢ်​အဂၤ​လီၤ. ပှၤ​စံၣ်တဲၤ​တဲလီၤ​တၢ်ဖိ​လၢ အ​သူၣ်ဆူၣ်​သးဆူၣ်​ခံဂၤ​အံၤ လဲၤ​စံၣ်တဲၤ​တဲလီၤ​တၢ်​လၢ တၢ်လီၢ်​လၢ​အ့ၡၢၣ်​အ​ပူၤ ဒ်သိး​ဒီး ဝ့ၢ်​ဒ့ၢ်ဘ့ၤ, ဝ့ၢ်​လူစတြၤ ဒီး​ဝ့ၢ်​အံၤ​က​နံၤ​အ​ပူၤ​လီၤ.

ပှၤ​ကဲဒိၣ်​မ့ၢ်ဂ့ၤ ပှၤဖှီၣ်​ဖိ​မ့ၢ်ဂ့ၤ ပှၤသးစၢ်​မ့ၢ်ဂ့ၤ ပှၤသးပှၢ်​တဖၣ်​မ့ၢ်ဂ့ၤ စီၤ​ပီလူး​ဒီး​စီၤ​ဘၢ်နါဘၤ လဲၤ​စံၣ်တဲၤ​တဲလီၤ​တၢ်​ဆူ အဝဲသ့ၣ်​အ​အိၣ်​ကိးဂၤ​ဒဲး​လီၤ. ပှၤ​အါဂၤ​တူၢ်လိာ်ဝဲ​တၢ်မ့ၢ်​တၢ်တီ ဘၣ်ဃး​ဒီး​ခရံာ်​လီၤ. ဖဲ​စီၤ​ပီလူး​ဒီး​စီၤ​ဘၢ်နါဘၤ စံၣ်တဲၤ​တဲလီၤ​တၢ်​လၢ စီၤစ့ၢ်ကံပီလူး​လၢ အ​မ့ၢ်ဝဲ ကူပြူး​ပဒိၣ်​အ​အိၣ်​အခါ ပှၤ​အူ​တၢ်သမူ​တၢ်​တဂၤ ဂုာ်ကျဲးစၢး​မၤ​ပတုာ်​အဝဲသ့ၣ်​လီၤ. စီၤ​ပီလူး​တဲဘၣ် ပှၤ​အူ​တၢ်သမူ​တၢ်​လၢ– ‘ယဟိဝၤ​ယွၤ​က​စံၣ်ညီၣ်​နၤ​လီၤ.’ တဘျီဃီ​န့ၣ် ပှၤ​အူ​တၢ်သမူ​တၢ်​တဂၤ​အံၤ​အ​မဲာ်ချံ တထံၣ်​တၢ်​လၢၤဘၣ်. ပဒိၣ်​စီၤစ့ၢ်ကံပီလူး ထံၣ်ဝဲ​တၢ်မၤ​အသး​ဒ်အံၤ​အဃိ စူၢ်က့ၤ​နာ်က့ၤ​တၢ်​လီၤ.

စီၤ​ပီလူး​ဒီး​စီၤ​ဘၢ်နါဘၤ စံၣ်တဲၤ​တဲလီၤ​တၢ် ဟံၣ်​တဖျၢၣ်​ဘၣ်​တဖျၢၣ်, လၢ​ပှၤဆါ​တၢ်​ပှ့ၤတၢ်​အလီၢ်, လၢ​ကျဲမုၢ်ခိၣ်, လၢ​ဘူၣ်ဘျီၣ်​အ​ပူၤ ဒီး​လၢ​တၢ်လီၢ်​ကိးပူၤဒဲး​လီၤ. ဖဲ​အဝဲသ့ၣ်​အိၣ်​လၢ ဝ့ၢ်​လူစတြၤ​အခါ မၤဘျါ​ဝဲ ပိာ်ခွါ​လၢ​အ​ခီၣ်​ဟးဂီၤ​တဂၤ​လီၤ. ပှၤ​ဂီၢ်မုၢ်​လၢ​အ​ထံၣ်ဘၣ် တၢ်​လီၤလး​အံၤန့ၣ် ဆိကမိၣ်​ဝဲ​လၢ စီၤ​ပီလူး​ဒီး​စီၤ​ဘၢ်နါဘၤ မ့ၢ်ဝဲ​ယွၤ​တဖၣ်​လီၤ. အဃိ ပှၤ​ဂီၢ်မုၢ်​သ့ၣ်​တဖၣ်​အံၤ ဂုာ်ကျဲးစၢး ဘူၣ်ထီၣ်​ဘါထီၣ်​အဝဲသ့ၣ်​လီၤ. ဘၣ်ဆၣ် စီၤ​ပီလူး​ဒီး​စီၤ​ဘၢ်နါဘၤ တဲဘၣ်​အဝဲသ့ၣ်​လၢ– ‘ပ​မ့ၢ်​ပှၤ​ဟီၣ်ခိၣ်​ဖိ​ဒ်သိး​သု​လီၤ. ဘူၣ်ထီၣ်​ဘါထီၣ် ထဲ​ကစၢ်​ယွၤ​တဂၤဧိၤ​တက့ၢ်.’ လၢခံ ပှၤ​ယူဒၤ​ဖိ​တနီၤ ဟဲ​ဒီး​တဲ​အၢ​တဲ​သီ​ဝဲ စီၤ​ပီလူး​အဂ့ၢ်​ဒ်သိး ပှၤ​ဂီၢ်မုၢ်​တဖၣ် က​သးဟ့ဝဲ စီၤ​ပီလူး​အဂီၢ်​လီၤ. အဃိ ပှၤ​ဂီၢ်မုၢ်​တဖၣ် ကွံာ်​စီၤ​ပီလူး​လၢ​လၢၢ်, တွံၢ်ထီၣ်​စီၤ​ပီလူး​လၢ​ဝ့ၢ်ချၢ ဒီး​ပာ်တ့ၢ်​အီၤ​ဖဲ​န့ၣ်​လီၤ. ဘၣ်ဆၣ် စီၤ​ပီလူး​တ​သံ​ဒံး​ဘၣ်. ဒီပုၢ်ဝဲၢ်​တဖၣ်​ဟဲ​မၤစၢၤ​အီၤ ဒီး​က့ၤကိး​အီၤ​ဆူ ဝ့ၢ်​ပူၤ​လီၤ. လၢခံ စီၤ​ပီလူး​က့ၤကဒါက့ၤ​ဝဲ​လၢ ဝ့ၢ်​အၣ်တံၤအီာ်​လီၤ.

ဖဲ ခ.န. ၄၉ နံၣ်​န့ၣ် စီၤ​ပီလူး​လဲၤ​က​ဒီး​တၢ် လၢ​အသီ​တဘျီ​လီၤ. အဆိ​ကတၢၢ် အဝဲ​က့ၤ​ထံၣ်​လိာ်သး​ဒီး ဒီပုၢ်ဝဲၢ်​လၢ အ့ၡၢၣ် ဝံၤ​အလီၢ်​ခံ အဝဲ​လဲၤ​စံၣ်တဲၤ​တဲလီၤ တၢ်သးခု​ကစီၣ်​လၢ ကီၢ်​ယူရပၤ​လီၤ. စီၤ​ပီလူး​လဲၤဝဲ​လၢ အၤသ့ၣ်, အ့းဖ့းစူး, ဖံလံးပံၤ, သ့းစၤလနံ ဒီး​တၢ်လီၢ်​အဂၤ​တဖၣ်​လီၤ. စီၤ​စံလၤ, စီၤ​လူၤကၣ် ဒီး​ပှၤသးစၢ်​လၢ အမ့ၢ် စီၤ​တံၤမသ့း​န့ၣ် လဲၤ​ဃုာ်​တၢ်​ဒီး​စီၤ​ပီလူး​လၢ အ​တၢ်​လဲၤတၢ်​က့ၤ​တဘျီ​အံၤ​လီၤ. အဝဲသ့ၣ်​မၤ​သကိး​တၢ် ဒ်သိး​က​ဒုးအိၣ်​ထီၣ်ဝဲ​တၢ်​အိၣ်ဖှိၣ်​တဖၣ် ဒီး​မၤစၢၤဝဲ​ဒီပုၢ်ဝဲၢ်​ဖဲ​န့ၣ်​တဖၣ်​လၢ အဝဲသ့ၣ် အ​တၢ်နာ်​က​ဂၢၢ်ကျၢၤ​ထီၣ်ဝဲ​အဂီၢ်​လီၤ. အဒိ ဒ်သိး​ဒီပုၢ်ဝဲၢ်​လၢ ကရံၣ်သူး​တၢ်​အိၣ်ဖှိၣ်​ပူၤ အ​နီၢ်သး​က​ဆူၣ်​ထီၣ်​အဂီၢ် စီၤ​ပီလူး​အိၣ်​တီၢ်ဝဲ​ဖဲ​န့ၣ် တနံၣ်​တခီ​လီၤ. စီၤ​ပီလူး​စံၣ်တဲၤ​တဲလီၤ​တၢ်, သိၣ်လိ​သီ​လိ​တၢ်, ဒီး​ကွဲး​လံာ်ပရၢ​ဆူ တၢ်​အိၣ်ဖှိၣ်​အါ​ဖျၢၣ်​အ​အိၣ်​လီၤ. ဒီး​အဝဲ​မၤ​တၢ်မၤ ဒ်​ပှၤ​ဆး​ဒဲ​တဂၤ​အသိး​လီၤ. လၢခံ စီၤ​ပီလူး​က့ၤဝဲ​ဆူ ဝ့ၢ်​အၣ်တံၤအီာ်​လီၤ.

လၢခံ ဖဲ ခ.န. ၅၂ နံၣ်​န့ၣ် စီၤ​ပီလူး​လဲၤ​က​ဒီး​တၢ် သၢ​ဘျီတဘျီ​လီၤ. အဆိ​ကတၢၢ်​န့ၣ် အဝဲ​လဲၤ​လၢ အ့ၡၢၣ် ဝံၤဒီး​အဝဲ​လဲၤ​လၢ​ကလံၤစိး​တုၤ​လီၤ​လၢ ဖံလံးပံၤ ဒီး​က့ၤ​လီၤ​ဆူ ကရံၣ်သူး​လီၤ. စီၤ​ပီလူး​အိၣ်ဝဲ​လၢ အ့းဖ့းစူး​အ​ပူၤ တဘျုး​နံၣ်​ညါ. ဖဲ​န့ၣ်​န့ၣ် အဝဲ​သိၣ်လိ​သီ​လိ​တၢ်, မၤဘျါ​က့ၤ​ပှၤဆါ ဒီး​မၤစၢၤ​တၢ်​အိၣ်ဖှိၣ်​န့ၣ်​လီၤ. တကးဒံးဘၣ် ကိးနံၤဒဲး​န့ၣ်​စီၤ​ပီလူး ဟ့ၣ်​စ့ၢ်ကီး​တၢ်​စံၣ်တဲၤ​တဲလီၤ​တၢ် လၢ​ကမျၢၢ်​အဂီၢ် လၢ​ကၠိ​တဖျၢၣ်​အ​ပူၤ​လီၤ. ပှၤ​အါဂၤ​ဒိကနၣ်​ဝဲ စီၤ​ပီလူး​အ​တၢ်​စံၣ်တဲၤ​တဲလီၤ ဒီး​အဝဲသ့ၣ်​ဆီတလဲ​က့ၤ အ​တၢ်အိၣ်မူ​လီၤ. လၢခံ ဖဲ​စီၤ​ပီလူး စံၣ်တဲၤ​တဲလီၤ​တၢ်သးခု​ကစီၣ်​လၢ တၢ်လီၢ်​အါတီၤ​ဝံၤ​အလီၢ်​ခံ အဝဲ​က့ၤကဒါက့ၤ​ဆူ ယရူၤၡလ့ၣ်​လီၤ.