Antumwa balemvokela nkanikinu a Yesu wa mwanganesa e nsangu zambote mu nza yawonso. Muna mvu wa 47 wa Tandu Kieto, ampangi kuna Antiokia batuma Paulu yo Banaba benda muna salu kia samuna e nsangu zambote. Ateleki wole awaya akwa vema, bakangala mu zunga yawonso ya Ásia Menor yakuna zunga kia Delebe, Luseta ye Ikonio.

Paulu yo Banaba basilanga umbangi kwa konso muntu, kiakala mvuama yovo nsukami, nleke yovo mbuta. Wantu ayingi batambulwila e ludi mu kuma kia Kristu. Vava Paulu yo Banaba basila umbangi kwa Sengio Pauluse wa nguvulu a Kupero, ngang’a nkisi mosi wavava kubakakidila. Paulu wavovesa ngang’a nkisi ndioyo vo: ‘Yave usidi kitantu.’ Vana vau, ngang’a nkisi wafwa meso. Vava kamona diambu diadi, o nguvulu Pauluse wakwikila muna Kristu.

Paulu yo Banaba basilanga umbangi mu fulu yawonso, nze mu nzo ye nzo, muna mazandu, muna nzila ye muna masambilu. Vava bawuka mbevo a malu kuna Luseta, awana bamona e sivi diadi babanza vo Paulu yo Banaba zinzambi ye bazola nkutu kubasambila. Kansi, Paulu yo Banaba ke babayambula ko, bavova vo: ‘Nzambi kaka nufwete sambila. Oyeto tu mpasi wantu.’ I bosi, Ayuda bayiza yo vukumuma ulolo wa wantu kimana basia Paulu kitantu. Buka kia wantu bayantika tuba Paulu matadi yo kumvaikisa muna mbanza yo kunsisa kadi babanza vo ofwidi. Kansi, Paulu kafwa ko. Vana vau, ampangi bayiza kunsadisa yo kunata muna mbanza. Kuna kwalanda, Paulu wavutuka kuna Antiokia.

 Muna mvu wa 49 wa Tandu Kieto, Paulu wayenda diaka mu nkangalu wankaka. Vava katuka kuna Ásia Menor mu kingula ampangi, Paulu wayenda samuna e nsangu zambote mu zunga yayingi, yakuna Europa. Wayenda kuna Atenai, Efeso, Filipi, Tesalonika ye mu fulu yankaka. Sila, Luka yo nleke Timoteo bayikama Paulu mu nkangalu wau. Basala entwadi muna sikidisa e nkutakani yo kumika zo. Paulu mvu mosi ye ndambu kakala kuna Korinto mu kumika ampangi. Wasila umbangi, walonga yo twika nkanda mu nkutakani zayingi. Wasalanga mpe e salu kia tunga nzo za ngoto. Kuna kwalanda, Paulu wavutuka kuna Antiokia.

Muna mvu wa 52 wa Tandu Kieto, Paulu wayenda mu nkumbu wantatu kuna Ásia Menor. Wayenda kuna node yo lwaka kuna mbanza Filipi ye kuna Korinto. Paulu mvu miayingi kaviokesa muna Efeso, walonganga, wawukanga wantu yo sadisa e nkutakani. Wafilanga mpe malongi konso lumbu muna seka dia sikola. Ayingi bawá e nsangu kasamunanga yo soba mpil’a zingu kiau. Vava Paulu kasamuna e nsangu zambote mu nsi zayingi, wayenda kuna Yerusaleme.