Baapositola nebalatelezi taelo ya Jesu ya kuhasanya taba yende mwa lifasi kaufela. Mwa silimo sa 47 C.E., mizwale mwa Antioke baluma Paulusi ni Barnabasi kuyo eza musebezi wa kukutaza. Bakutazi bababeli babatukufalezwi bao bafita mwa Asia Minor mwa libaka zeswana sina Derba, Listra, ni Ikone.

Paulusi ni Barnabasi bakutaza ku mañi ni mañi, ibe kuli ki mufumi kamba mubotana, mwanana kamba yomuhulu. Batu babañata baamuhela niti ka za Kreste. Paulusi ni Barnabasi hane bakutalize ku Sergiusi Paulusi, mubusisi wa Sipera, muuna yomuñwi yanaali mulauli alika kubatuhelisa. Paulusi abulelela mulauli yo kuli: ‘Jehova ukuhalifezi.’ Honafo, mulauli yo aba sibofu. Mubusisi Paulusi hanaaboni lika zeo, aba mulumeli.

Paulusi ni Barnabasi bakutaza kai ni kai, fa ndu ni ndu, mwa misika, mwa mikwakwa, ni mwa sinagoge. Hane bafolisize muuna wa sihole mwa Listra, batu bane baboni makazo yeo baanga kuli Paulusi ni Barnabasi neli milimu mi balika kubalapela. Kono Paulusi ni Barnabasi babahanisa, ka kubulela kuli: ‘Mulapele feela Mulimu! Lu batu feela.’ Majuda babañwi bataha mi bakukueza buñata bwa batu kufetuhela Paulusi. Batu bao bamupobaula macwe, bamunepela kwande a muleneñi, mi bamusiya ka kunahana kuli ushwile. Nihakulicwalo, Paulusi naasapila! Honafo feela, mizwale bataha kuli bamupilise mi bamuunga ni kumutisa mwa tolopo. Hasamulaho, Paulusi akutela kwa Antioke.

Mwa silimo sa 49 C.E., Paulusi atama musipili omuñwi hape. Hasaakutile kuyo bona mizwale mwa Asia Minor, akutaza taba yende  kuyo fita ni kwa libaka za kwahule, mwa Europe. Aya kwa Atene, Efese, Filipi, Tesalonika, ni kwa libaka zeñwi. Silasi, Luka, ni mutangana yomuñwi yabizwa Timotea baya ni Paulusi mwa musipili wahae. Nebabelekile hamoho kutoma liputeho zenca ni kulitusa kutiya. Paulusi aina mwa Korinte silimo silisiñwi ni licika, kuli atiise mizwale. Naakutalize, kuluta, ni kuñolela mañolo liputeho zeñata. Hape naaezanga musebezi omuñwi wa kueza litende. Hamulaho wa nako, Paulusi akutela kwa Antioke.

Hasamulaho, mwa silimo sa 52 C.E., Paulusi atama musipili wahae wabulaalu kukalela mwa Asia Minor. Ayo fita mane ni kwa mutulo wa Filipi, hasamulaho aya mwa Korinte. Paulusi naainzi lilimo zeñata mwa Efese, inze aluta batu, kufolisa, ni kutusa puteho. Hape naafanga lingambolo za nyangela zazi ni zazi mwa muyaho omutuna wa sikolo. Batu babañata nebateelelize mi nebacincize mupilelo wabona. Kwa mafelelezo, Paulusi hasaakutalize taba yende mwa libaka zeñata, aya kwa Jerusalema.