Batumibwa bākōkele musoñanya wa Yesu wa kuzambalaja myanda miyampe pano pa ntanda ponso. Mu 47 Y.M. (Yesu ke mwiye), banabetu ba mu Antyioka bātumine ba Polo ne Banabasa bende bakasapule. Bano basapudi babidi bapyasakane bāendele mu bifuko bya mu Azia Minele monso, kimfwa mu Debe, Lesetala, ne Ikoniuma.

Ba Polo ne Banabasa bāsapwidile bantu bonso, bampeta ne balanda, banuke ne batame bene. Bantu bavule bāitabije bubine bwa myanda ya Kidishitu. Ba Polo ne Banabasa pobāsapwidile Sengusa Polosa, mbikavu wa Saipusa, muntu umo wa majende wādi kasake kwibakankaja. Polo wāsapwila uno muntu wa majende amba: ‘Yehova ulwanga nobe.’ Ponka na ponka, muntu wa majende’wa wāikala mpofu. Mbikavu Polosa pa kumona kino, wāitabija.

Ba Polo ne Banabasa bāsapwile konso-konso, ku njibo ne njibo, mu mansoko, mu bipito, ne mu mashinankonka. Pobābelwile mwana-mulume umo mulemane mu Lesetala, bantu bēmwenine kino kingelengele balangile amba i baleza, kebakimbe kwibatōta. Inoko ba Polo ne Banabasa bēbakankaja’mba: ‘Tōtai’nka Leza kete! Twi bantu’tu bitupu.’ Bayuda bamo bāiya mwanda wa kulengeja bantu ba mu kibumbo batombokele Polo. Bano bantu bāashile Polo mabwe, bāmubulwila panja pa kibundi, bāmwela’mba wafu. Inoko, Polo wādi ukidi mūmi! Ponka na ponka, banababo bāiya kumupandija na kumuselela mu kibundi. Kupwa, Polo wājokela ku Antyioka.

Mu mwaka wa 49 Y.M., Polo wāendele lwendo lukwabo. Aye pa kupwa kwenda kukamona banababo ba mu Azia Minele, wākasapwile myanda miyampe kulampe bininge, mu Bulaya. Wāendele ku Atene, Efisesa, Fidipai, Tesalonika, ne ku bifuko bikwabokwabo. Ba Shilasa, Luka, ne nkasampe umo witwa bu Temote bālondele Polo mu lwendo lwandi. Bāingidile pamo mwanda wa kushimika bipwilo ne kwibikwasha bikale bikomo. Polo wāshikete mu Kodinda mwaka mutuntulu ne kipindi ukomeja banababo. Wādi usapula, ufundija, ne kulembela bipwilo bivule mikanda. Kadi wādi wingila ne mwingilo wa kupunga mapema. Kitatyi pa kupita’po, Polo wājokela ku Antyioka.

Mwenda mafuku, ke mu mwaka wa 52 Y.M., Polo wāendele lwendo lwandi lwa busatu, na kushilwila mu Azia Minele. Wāendele kungala kwa Fidipai, kupwa wātūkila ku Kodinda. Polo wāikele mu Efisesa myaka mivule, ufundija, ubelula babela, ne kukwasha kipwilo. Kadi wādi unena ne mīsambo ya bantu bonso mu kalasa kamo ka ku masomo. Bantu bavule bātejeje, bāshinta ne mwiendelejo wabo. Ku mfulo, Polo pa kupwa kusapula myanda miyampe mu matanda mangi, wākajokele mu Yelusalema.