Bapostolo bakatumikila dîyi divua Yezu mubatumine dia kutangalaja lumu luimpe pa buloba bujima. Mu 47 panyima pa Yezu, bena Kristo ba mu Antiokia bakatuma Paulo ne Bânaba bua kuya mu luendu lua diyisha. Bayishi ba tshisumi aba bakanyunguluka Asia mukese yonso, kuyabu miaba bu mudi: Dêbe, Luseta, ne Ikonio.

Paulo ne Bânaba bakayisha bantu bonso: babanji ne bapele, bana ne bakulumpe. Bantu ba bungi bakitaba bulelela bua Kristo. Pavua Paulo ne Bânaba bayishe Sêgio Paulo, nguvena wa Kupulio, muena mupongo kampanda wakateta bua kubapangisha bua kuyisha. Ke Paulo kuambila muena mupongo au ne: ‘Yehowa udi ukupesha dinyoka.’ Diakamue muena mupongo au kushalaye mpofo. Padi nguvena Sêgio Paulo umona anu bualu abu, kuluaye muena kuitabuja.

Paulo ne Bânaba bavua bayisha miaba yonso: ku nzubu ne ku nzubu, mu bisalu, mu njila, ne mu nsunagoga. Pavuabu bondope mulema kampanda mu Luseta, bantu bavua bamone tshishima atshi bakela meji ne: bavua banzambi, bobu kujinga bua kubatendelela. Kadi Paulo ne Bânaba bakabakanda bamba ne: ‘Tendelelayi anu Nzambi! Tuetu tudi anu bantu betu ba tshianana aba.’ Pashishe bena Yuda bakuabu bakalua, kusakabu musumba wa bantu bua kukudimukilawu Paulo. Musumba wa bantu au wakamuasa mabue, kumupulumunawu too ne pambelu pa tshimenga, kumushiyabu bela meji ne: mmufue. Kadi Paulo utshivua anu ne muoyo! Diakamue bena Kristo nende bakalua kumuambuluisha, kupinganabu nende mu tshimenga. Paulo wakalua kupingana ku Antiokia.

Mu 49 panyima pa Yezu, Paulo wakenza luendu lukuabu lua diyisha. Yeye mumane kupingana mu Asia mukese bua kumona bena Kristo nende,  wakayisha lumu luimpe too ne ku Mputu. Wakaya ku Atena, ku Efeso, ku Filipoyi, ku Tesalonike, ne miaba mikuabu kabidi. Sila, Luka, ne nsongalume mukuabu dîna diende Timote bakaya kudisangisha ne Paulo mu luendu luende alu. Bakenza nende mudimu bua kuenza bisumbu ne kubikolesha. Paulo wakashala mu Kolinto tshidimu tshijima ne tshitupa, wenda ukolesha bena Kristo ba muntu amu. Uvua uyisha, ulongesha, ne ufundila bisumbu bia bungi mikanda. Uvua kabidi wenza mudimu wa dienza ntenta. Ndekelu wa bionso Paulo wakapingana ku Antiokia.

Pashishe, mu 52 panyima pa Yezu, Paulo wakenza luendu luisatu ubangila mu Asia mukese. Wakaya too ne ku nord ku Filipoyi, pashishe kupuekaye ku Kolinto. Paulo wakenza bidimu bia bungi mu Efeso, ulongesha, wondopa, ne wambuluisha tshisumbu tshia muntu amu. Uvua kabidi wenza miyuki ya patoke dituku dionso mu tshilongelu kampanda. Bantu ba bungi bakamuteleja, kushintululabu nsombelu wabu. Ndekelu wa bionso, Paulo mumane kuyisha lumu luimpe mu matunga a bungi, wakaya ku Yelushalema.