LEZZJONI 98
It-tagħlim Kristjan jixxandar f’ħafna pajjiżi
L-appostli obdew il-kmand taʼ Ġesù biex jippritkaw l-aħbar tajba mad-dinja kollha. Fis-sena 47 WK, l-aħwa f’Antjokja bagħtu lil Pawlu u lil Barnaba fuq vjaġġ taʼ ppritkar. Iż-żewġ dixxipli żelużi vvjaġġaw madwar l-Asja Minuri kollha (illum magħrufa bħala t-Turkija) f’postijiet bħal Derbe, Listra, u Ikonju.
Pawlu u Barnaba ppritkaw lil kulħadd, lis-sinjuri u lill-foqra, liż-żgħar u l-kbar. Ħafna aċċettaw il-verità dwar Kristu. Meta Pawlu u Barnaba bdew jippritkaw lil Serġju Pawlu, il-mexxej taʼ Ċipru, kien hemm saħħar li pprova jwaqqafhom. Pawlu qal lis-saħħar: ‘Ġeħova se jikkastigak għal dan il-ħażin li qed tagħmel.’ Dak il-ħin, is-saħħar ma baqax jara. Malli ra dan, il-Gvernatur Pawlu sar jemmen.
Pawlu u Barnaba ppritkaw kullimkien, minn dar għal dar, fuq il-monti, fit-toroq, u fis-sinagogi. Meta fejqu raġel li ma kienx jimxi sew f’Listra, dawk li raw il-miraklu jseħħ ħasbu li kienu allat u pprovaw iqimuhom. Imma Pawlu u Barnaba waqqfuhom billi qalu: ‘Qimu biss lil Alla! Aħna nies bħalkom.’ Imbagħad ġew xi Lhud u dawru lill-folla kontra Pawlu. In-nies li kien hemm fil-folla tefgħulu l-ġebel biex joqtluh, kaxkruh ’il barra mill-belt, u ħallewh hemm għax ħasbu li kien mejjet. Imma Pawlu kien għadu ħaj! L-aħwa malajr marru jgħinuh u ħaduh lura fil-belt. Iktar tard, Pawlu mar lura Antjokja.
Fis-sena 49 WK, Pawlu mar fuq vjaġġ ieħor. Wara li mar lura
fl-Asja Minuri biex jara l-aħwa, hu anki mar fl-Ewropa, bl-aħbar tajba. Mar Filippi, Tessalonika, Ateni, u postijiet oħra. Sila, Luqa, u żagħżugħ jismu Timotju ngħaqdu maʼ Pawlu fuq il-vjaġġ tiegħu. Huma ħadmu flimkien biex jifformaw kongregazzjonijiet u biex jgħinuhom jissaħħu. Pawlu baqaʼ Korintu sena u nofs biex isaħħaħ l-aħwa t’hemmhekk. Hu pprietka, għallem, u kiteb ittri lil kongregazzjonijiet. Kien ukoll jagħmel it-tined. Wara xi żmien, Pawlu għadda minn Efesu u mbagħad mar lura Antjokja (tas-Sirja).Iktar tard, fis-sena 52 WK, Pawlu beda t-tielet vjaġġ tiegħu mill-Asja Minuri. Pawlu qattaʼ xi snin Efesu jgħallem, ifejjaq, u jgħin lill-kongregazzjoni. Kuljum kien ukoll jagħti taħditiet pubbliċi ġo sala tal-iskola. Ħafna nies semgħu u bidlu ħajjithom. Imbagħad hu vvjaġġa ’l fuq sa Filippi u wara niżel lejn Korintu. Fl-aħħar, wara li pprietka l-aħbar tajba f’ħafna pajjiżi, Pawlu mar Ġerusalemm.
“Għalhekk, morru u agħmlu dixxipli min-nies tal-ġnus kollha.”—Mattew 28:19