Nopa apóstoles kimoyajkej nopa kuali tlamachtili ipan nochi Tlaltipaktli kej Jesús kinnauatijtoya. Ipan xiuitl 47, toikniuaj tlen euayayaj Antioquía kintitlankej Pablo uan Bernabé ma yakaj tlajtolmoyauatij uejka. Inijuantij tlajtolmoyajtiauiyayaj ika pakilistli ipan altepemej tlen eltoya ipan Asia Menor, kej Derbe, Listra uan Iconio.

Kema Pablo uan Bernabé tlajtolmoyauayayaj, kinkamanaljuiyayaj nochi maseualmej: katli tlatominpixtoyaj uan katli amo, telpokamej uan katli ya uejueyij. Miakej tlaneltokakej ipan Cristo. Kema Pablo uan Bernabé kikamanaljuijkej tlanauatijketl tlen Chipre, katli motokaxtiyaya Sergio Paulo, se tetlajchiuijketl kinejki kintsakuilis. Pablo kiiljuik nopa tetlajchiuijketl: “Jehová mitstlatsakuiltis”. Uan nopa tlakatl ayokmo tlachixki. Kema Sergio Paulo kiitak tlen panok tlaneltokak ipan Cristo.

Pablo uan Bernabé kampa ueli tlajtolmoyauayayaj: kajkalpa, kampa tlanamakayayaj, ojtipa uan ipan sinagogas. Se tonali, kichikajkej se katli amo ueliyaya nejnemi ne Listra. Kema maseualmej kiitakej tlen kichijtoyaj, moiljuijkej eliyayaj teotsitsij uan kinejkej kinueyichiuasej. Pablo uan Bernabé amo mokajkej ma kinueyichiuakaj, uan kiniljuijkej: “¡Kinamiki san toTeotsij inkiueyichiuasej! Tojuantij nojkia timaseualmej”. Uajka asitoj se keskij judíos uan kichijkej ma kikualankaitakaj Pablo. Yeka maseualmej kitepachojkej uan kiuauatatskej altepeteno. Maske moiljuiyayaj kimiktijtoyaj, ¡Pablo nojua yoltoya! Toikniuaj nimantsi kipaleuitoj uan sampa kiuikakej ipan altepetl. Teipa, Pablo tlakuepilik Antioquía.

Ipan xiuitl 49, Pablo ika ompa tlajtolmoyauato uejka. Kinitato toikniuaj katli itstoyaj ipan Asia Menor uan teipa nojkia tlajtolmoyauato ne Europa. Yajki Atenas, Éfeso, Filipos, Tesalónica uan ipan sekinok  altepemej. Yajkej iuaya, Silas, Lucas uan se telpokatl tlen motokaxtiyaya Timoteo. Sansejko tlatekipanojkej uan tlapaleuijkej ma mochiua yankuik tlanechikoli uan kinpaleuijkej toikniuaj kuali ma tlaneltokakaj. Pablo mokajki ne Corinto se xiuitl uan tlajko pampa kinejki kinyolchikauas toikniuaj. Tlajtolmoyauayaya, tlamachtiyaya uan kititlaniyaya amatlajkuiloli ipan miak tlanechikoli. Nojkia tekitiyaya, kichijchiuayaya yoyonkali. Teipa, Pablo sampa tlakuepilik Antioquía.

Teipa, ipan xiuitl 52, Pablo ika expa tlajtolmoyauato uejka. Kistejki Asia Menor uan yajki ika norte, asito Filipos uan teipa temok Corinto. Pablo mokajki miak xiuitl ne Éfeso kampa tlamachtik, techikajki uan kinpaleuik toikniuaj ipan tlanechikoli. Nojkia mojmostla kinmachtiyaya miakej maseualmej katli mosentiliyayaj ipan se escuela. Miakej kuali kitlakakilijkej uan kipatlakej ininnemilis. Teipa, kema Pablo ya tlajtolmoyajtoya ipan miak altepemej, sampa yajki Jerusalén.