Tatitanilmej kiteixmatiltijkej tein kuali tein Dios kichiuas, ijkon kemej Jesús kinnauatij maj kichiuakan itech nochi taltikpak. Itech xiuit 47, tokniuan akin nemiaj Antioquía kintitankej Pablo uan Bernabé maj tanojnotsatij itech miak altepemej. Yejuan ika yolpakilis tanojnotstinenkej nochi Asia Menor itech xolalmej kemej Derbe, Listra uan Iconio.

Pablo uan Bernabé kinojnotsayaj akin yeski: akin tominpiayaj uan akin amo, telpochmej uan akin uejueykejya. Miakej mochiujkej itatojtokakauan Cristo. Pablo uan Bernabé no kinojnotskej Sergio Paulo, akin tekiuajtia Chipre, sayoj ke se naual kitemoj kintsakuilis. Pablo kiluij nejon naual: “Jiova mitstatsakuiltiti”. Ijkuak, naual ixpojpoliuik. Keman tekiuaj kiitak nejon, taneltokak.

Pablo uan Bernabé noyampa tanojnotskej: kajkalpan, itech tanamakaloyamej, itech ojmej uan itech inintiopan judíos. Se tonal, kipajtijkej se koxoj itech xolal Listra. Akin kinitakej kinemilijkej ke katkaj dioses uan kinekkej kinueyichiuaskej. Pablo uan Bernabé amo kinkaujkej, ta kiniluijkej: “¡Moneki se kiueyichiuas sayoj Dios! Tejuan sayoj titakamej”. Ompa, ajsikej seki judíos akin kichiujkej maj taltikpakneminij kiixnamikinij Pablo. Yejuan kitetenkej uan kititilatskej hasta kalampa itech xolal uan kinemilijkej ke momikilijkaya. ¡Sayoj ke Pablo yoltoyaok! Seki tokniuan niman kipaleuitoj uan oksepa kiuikakej itech xolal. Satepan, Pablo mokepak Antioquía.

Itech xiuit 49, Pablo oksepa miakkan yajtinemik. Kinitato tokniuan akin nemiaj Asia Menor uan satepan okachi uejka kiteixmatiltito tein kuali tein  Dios kichiuas, hasta Europa. Yajki Atenas, Éfeso, Filipos, Tesalónica uan okseki altepemej. Ijkuak, iuan yayaj Silas, Lucas uan se telpoch akin monotsaya Timoteo. Yejuan kipeualtijkej yankuik nechikolmej uan kinpaleuijkej akin ompa mosentiliayaj maj mochikauani inintakuaujtamatilis. Pablo hasta mokauak Corinto se xiuit uan tajko uan kinyolchikauak tokniuan. Tanojnotsaya, tamachtiaya uan kintajkuilouiliaya tokniuan itech nechikolmej. No kinchijchiuaya takenkalmej uan ijkon moixpanoltiaya. Satepan, oksepa mokepak Antioquía.

Itech xiuit 52, Pablo ika expa miakkan yajtinemik, uan peujteuak Asia Menor. Yajki kampa ika norte, hasta Filipos, uan satepan temok hasta Corinto. Pablo no mokauak miak xiujmej ompa Éfeso kampa tamachtijtinemik, tapajtijtinemik uan kinpaleuij tokniuan itech nechikol. Uan no, mojmostaj kitemakaya tanojnotsmej itech se kaltamachtiloyan. Miakej kineltokakej uan mopatakej. Satepan ke Pablo miakkan yajtinemik kiteixmatiltito tein kuali tein Dios kichiuas, yajki Jerusalén.