Vapostori vakazwira mutemo wa Jesu wo kwenda kocumaera masoko akanaka mu nyika yese. Muna 47 N.V.Y., hama jainga ku Antiokia jakatumira Pauro na Bharnabha kuti vaende kocumaera. Vacumaeri vaviri ava vaivangisira maningi vakaenda ku Azia Menori, mbhera kuguma ku Derbhii, Ristra pomwe no Ikonio.

Pauro na Bharnabha vaicumaera mundhu ari wese, azvinenyi murombo kana mukhupuki, majaha kana musharuka. Vandhu vakawanda vakadavira cokwadi ngo pamusoro pa Kristu. Njiku imweni pavainga ku Shipri, Pauro na Bharnabha vakacumaera nduna yo mu dhorobhemo yaizwi Serjio Pauro, asi muiti wo masaramuso umweni wakaeja kuvarambisa. Pauro wakamubvunja kuti: ‘Nyara ya Jehovha Mwari inowira kwauri.’ Pondhopo, muiti wo masaramuso wakagara bofu. Pakuvona izvo, Serjio Pauro wakava mutendi.

Pauro na Bharnabha vaicumaera kwese, muzi ngo muzi, mu mabazari, mu citaka pomwe no mu masinagoga. Pavakarapa mwanarume umweni waihwaja ku Ristra, vaya vakazvivona vakarangarira kuti ivona vainga zvimwari zve vakaeja kuvanamata. Asi Pauro na Bharnabha vakavarambisa, veciti: ‘Namatanyi Mwari Basi! Itusu tiri vandhu inga imwimwi.’ Perepo, vaJudha vamweni vakaita kuti vandhu vapandukire Pauro. Vandhu vaya vakatanga kumufura ngo mapuwe, perapo vakaenda komusia kunja ko dhorobha vecirangarira kuti wainga wafa. Pikija zvakadaro, Pauro wainga aciri penye! Hama Jakaviya ngo kukasika komutora zve johwirira naye mu dhorobha. Pa nguva imweni Pauro wakahwirira ku Antiokia.

Muna 49  N.V.Y., Pauro wakaita hwendo umweni wo kucumaera. Pakupera kuvona hama jainga ku Azia Menori, wakaenda kucumaera masoko akanaka  ndhambo maningi, ku Europa. Wakaguma ku Atena, ku Efeso, Firipo, Tesaronika pomwe no mativi amweni. Sira, Ruka no mujaha umweni waidanwa Timoti vakaenda na Pauro ku hwendo iji. Ivona vakashanda vese kuti vaumbe ungano jipsa no kujibesera kuti jive jakavanga. Pauro wakagara ku Korinto gore no meya, ecivangisa hama jo kondhoyo. Iyena wakacumaera, kujijisa no kutarira tsamba ku ungano jakawanda. Iyena wakaitazve basa rimweni inga muiti wo matende. Pa kufamba ko nguva Pauro wakahwirira ku Antiokia.

Mu mukuvo umweni, mu gore 52  N.V.Y., Pauro wakahwirirazve kocumaera ko citatu, kutangira ngo ku Azia Menori. Wozoenda ku Firipo zve woterera kuenda ku Korinto. Pauro wakapeja makore akawanda ku Efeso, ecijijisa, kurapa no kubesera ungano. Njiku jese iyena waiita hurukuru yo vese pa cikora. Vandhu vakawanda vakazwira zve vakasia kuita zvakashata. Pa kupera kucumaera masoko akanaka mu nyika jakawanda, Pauro wakaenda ku Jerusarema.