Laʼoʼö fareta Yesu ira sinenge ba wangombakha turia somuso dödö ba zi sagörö ulidanö. Me döfi 47 M, laʼandrö khö Waulo hegöi Baranaba ira niha Gandriokhia enaʼö möi ira manuriagö. Yaʼira si darua si terou tödö andre, laʼanöröi zi sagörö Asia Kecil (iadaʼa töinia Turki) möi ira ba Derebe, Lisitera, Nikonia.

Faulo hegöi Baranaba, laturiaigö duria somuso dödö ba niha fefu, he si tosasa mazui si kayo, sawuyu-wuyu hegöi satua. Buania ato niha samati khö Keriso. Me fahuhuo Waulo faoma Baranaba khö Zeregio Faulo gubernur Gifero, so zi fakelemu zanaha yaʼia. Imane khönia Faulo, ’Ihuku ndraʼugö Yehowa.’ Izumaigö balunö zi fakelemu andrö. Me iʼila daʼö Gubernur Faulo, mamati ia khö Keriso.

Manuriaigö ba nomo misa Waulo hegöi Baranaba, ba harimbale, ba lala, ba nahia waʼowulo. Me lafadöhö ndra matua sombuyu-mbuyu töla ba Lisitera, lawalinga lowalangi ira niha ba labeʼe khöra zumange. Hizaʼi lamane, ’Ha Lowalangi zinangea mufosumange! Niha ndraʼaga.’ Aefa daʼö tohare ösa niha Yahudi samarou niha si so ba daʼö irege mofönu ira khö Waulo. Latebu kara Waulo ira niha daʼö ba lasöbi ia baero. Aefa daʼö, laröi manö ia, lawalinga no mate. Hizaʼi, lö si mate Waulo! Latolo ia ira awönia ba laʼohe ia ba mbanua sebua. Furi daʼö, ifuli zui möi Waulo ba Gandriokhia.

Me 49 M ifuli zui mofanö Waulo. Ifuli ifalukhaisi niha Keriso ba Asia Kecil, aefa daʼö manuriaigö ia ba nahia saröu ba Eropa. Möi ia ba  Natena, Efeso, Filifi, Tesalonika hegöi ba nahia tanö böʼö. Fao khönia Zila, Luka, ba ono matua sotöi Timoteo. Falulu fohalöwö ira wamasindro banua niha Keriso ba lafarou dödö niha ba daʼö. Toröi Waulo ba Gorindro döfi amatonga ba wamarou tödö niha Keriso ba daʼö. Ituriaigö duria somuso dödö, mamahaʼö ia ba ifaʼoheʼö zura ba mbanua niha Keriso misa. Mohalöwö ia göi tobali samazökhi tendra. Aefa daʼö, mangawuli Waulo ba Gandriokhia.

Me 52 M, ifuli zui mofanö Waulo si medölu kali. Si oföna möi ia ba Asia Kecil. Aefa daʼö, itohugö weʼamöi ba Wilifi, numalö ba Gorindro. Mato hauga fakhe toröi Waulo ba Nefeso. Mamahaʼö ia ba daʼö, ifadöhö niha, ba ifarou dödö mbanua niha Keriso. Ero maʼökhö fahuhuo ia ba nahia waʼowulo ba zekola. Ato niha samondrongo ba lafalalini gera-erara. Ba gafuriata, me no oya mbanua nitörö Waulo ba wanuriaigö turia somuso dödö, mangawuli ia ba Yeruzalema.