Inyikọ na i nyalele akama i Jesu rẹ aye ine kerabọ iyẹnrẹn esiri Uvie na lele akpọ na ephian. Uvuẹn ẹgbukpe 47 C.E., imizu ri ha uvuẹn Antioch i dje Paul ọrhẹ Barnabas ye ruẹ owian aghwoghwo na uvuẹn ẹkwotọre sansan. Ighwoghwẹmro awanva ri vwo oruru na, ni riẹ amwa i Derbe, Lystra, kugbe Iconium uvuẹn Asia Minor.

Kohworho kohworho yi Paul ọrhẹ Barnabas i ghwoghwo riẹn, edafe, ivwiegbere, iphuphẹn kugbe eri kpako nẹ. Buebun ni rhiabọ dede urhomẹmro ro sekpahen i Jesu. Ọke i Paul ọrhẹ Barnabas e ghwoghwo rẹn igọvunọ ọrẹ Cyprus re se Sergius Paulus, ọhworhare owu rọ bepha nọ guọlọ da aye obọ jẹ. Paul nọ ta rẹn ọhworhare rọ bepha na: ‘Jehova ọ hasuọ.’ Ogege, ikẹro ọhworhare na ni turu. Ọke i Paulus ro rhiẹ igọvunọ ọrẹ Cyprus ọ mẹrẹn oborẹ ọ phiare na, no rhiẹ odibo Osolobrugwẹ.

Ekete ephian yi Paul ọrhẹ Barnabas e ghwoghwo, nẹ oghwa riẹ oghwa, uvuen eyi, izede ọrhẹ uvuẹn i synagogue. Ọke owu aye e simi ukpolo owu uvuẹn Lystra, ihworho ri mẹrẹn oborẹ ọ phiare na, ne roro taghene Paul ọrhẹ Barnabas isolobrugwẹ, aye na guọlọ ha ẹga rẹn aye. Ọrẹn, Paul ọrhẹ Barnabas ni da rẹ aye obọ ji, aye na ta: ‘Are i ga Osolobrugwẹ ọvo! Ame ihworho kpekpa.’ Itu i Jew ezẹko ni rhe mọ riẹriẹ ihworho na, nẹ aye i kparehaso i Paul. Ihworho na, na ha ukpokpo fi Paul, aye ni lọreriẹ ruẹ otafe amwa na, aye ni nyaje vwo no hwu. Ọrẹn, Paul o hwu-u! Imizu na ni rhe mọ sa ye erhumu ogege, aye ni jeghwai kpariẹ ruẹ uvuẹn amwa na. Ọke oru, Paul nọ ghwẹrioma riẹ Antioch.

Paul no riẹ owian aghwoghwo ọrọrọ uvuen ẹgbukpe 49 C.E. Ọke ọ ghwẹrioma bru imizu ri ha uvuẹn Asia Minor hin, no kerabọ iyẹnrẹn esiri na  lele ẹkwotọre sansan uvuẹn Europe. O riẹ Athens, Ephesus, Philippi, Thessalonica, ọrhẹ ẹkwotọre erọrọ. Silas, Luke kugbe uphuphẹn owu re se Timothy, ni homaba aye uvuen owian na. Aye i wian kugbe jeghwai ha ikoko buebun mwu, aye ni jeghwai bọn imizu na gbanhon. Ẹgbukpe owu gbẹ uphrophro yi Paul o rhirhiẹ i Corinth, ọye nọ bọn imizu na gbanhon. Paul o ghwoghwori, o yonorin, ọ ji ya ileta vwe ikoko buebun. Paul ọ ji wian owian ra bọn ibọkpọ. Ọke oru, Paul nọ ghwẹrioma riẹ Antioch.

Ọke oru, uvuẹn ẹgbukpe 52 C.E., Paul nọ rharhumu riẹ owian aghwoghwo ọrọrọ, nọ tonrhọ uvuẹn Asia Minor. Paul no riẹ Philippi, ọke oru, no riẹ i Corinth ri rhiẹ emwa iseseri omamọ. Paul ọ daji Ephesus te ẹgbukpe buebun, o yono ihworho, o simi ihworho re kpomẹ, ọ jeghwai ha userhumu rẹn ukoko na. Paul ọ ji ha ẹmro otu phia kẹdẹkẹdẹ uvuen aghwẹlẹ isukuru rọ ha avwaye. Ihworho buebun i kerhọ, aye ni jeghwai wẹnẹ akpenyerẹn aye. Obẹta ye, ọke i Paul o ghwoghwo iyẹnrẹn esiri na lele emwa buebun ne, no riẹ i Jerusalem.