Jesusqa kamacherqa Diosmanta tukuynejpi willanata. Chaytataj apostolesqa kasukorqanku. Antioquiamanta hermanosqa 47 watapi Pablota, Bernabetawan kacharqanku waj lugarespi Diosmanta willamunankupaj. Paykunaqa tukuy sonqo willamorqanku Asia Menorpi kaj Derbepi, Listrapi, Iconiopi ima.

Pablowan Bernabewanqa tukuy runasman predicarqanku. Chay runasmanta ashkhastaj Jesuspi creerqanku. Paykunaqa Chipreta kamachej Sergio Pauloman predicallarqankutaj. Uj layqa runataj paykunaman churanakorqa. Pablotaj payta nerqa: “Jehová Dios contraykipi kashan”, nispa. Chay layqataj ciegoyarqa. Sergio Paulotaj chayta rikuytawan Diospi creerqa.

Pablowan Bernabewanqa wasimanta wasi, mercadospi, ñankunapi, sinagogaspi ima predicarqanku. Uj kuteqa Listra llajtapi uj suchu runata sanoyacherqanku. Chayta rikuspataj runasqa, paykuna dioses kasqankuta yuyaspa yupaychayta munarqanku. Paykunaqa mana yupaychachikorqankuchu. Astawanpis nerqanku: “Diosllata yupaychana, noqaykoqa runaslla kayku”, nispa. Judiostaj chayamuspa Pabloj contranpi runasta churarqanku. Chay runastaj Pablota rumiswan chʼanqaykorqanku, wañusqata jina rikuspataj jawaman qhatatarqanku. Jinapis Pabloqa mana wañorqachu. Chantá hermanos jamuspa Pablota yanapaytawan llajtaman kutiykucherqanku. Qhepamantaj Pabloqa Antioquiaman kuterqa.

Pabloqa 49 watapi Asia Menorman rerqa hermanosta waturikoj. Chantá Europapi kaj Atenaspi, Efesopi, Filipospi, Tesalonicapi, waj  lugarespiwan predicarqa. Paywanqa rerqanku Silas, Lucas, Timoteo ima. Paykunaqa khuska llankʼarqanku mosoj congregacionesta rikhurichinankupaj, hermanosta kallpachanankupaj ima. Pabloqa Corintomanpis rillarqataj, wata khuskanniyojtataj qhepakorqa hermanosta kallpachananpaj. Chaypitaj predicaj, yachachej, ashkha congregacionesmantaj cartasta qhelqaj. Trabajajtaj toldosta ruwaspa. Qhepamantaj Pabloqa Antioquiaman kuterqa.

Pabloqa 52 watapi watejmanta Asia Menorman, Filiposman, Corintoman ima rillarqataj. Chantá Pabloqa Efesopi ashkha watasta karqa runasman yachachispa, runasta sanoyachispa, hermanosta yanapaspa ima. Chantapis sapa día uj lugarpi Diosmanta yachachej. Ashkha runastaj yachachisqanta kasukuspa kausayninkuta cambiarqanku. Chantá Pabloqa chay tukuy llajtaspi Diosmanta yachachiytawan Jerusalenman kuterqa.