Apostolkunaqa Jesus mandakunqanta wiyakurmi Diospita alli willakïkunata më tsëchö yachatsikuyarqan. Antioquïapita wawqikunam, 47 watachö apostol Pablutawan Bernabëta mandayarqan më tsëchö yachatsikuyänampaq. Ishkanmi Asia Menorchö këkaq Derbichö, Listrachö, Iconiuchö y mas markakunachö gänas gänaslla yachatsikuyarqan.

Pabluwan Bernabëqa pï mëtam parlapäyarqan: waktsatapis rïcutapis, jövintapis mayortapis y pita mëtapis. Mëtsikaqmi Cristuman creikuyarqan. Pabluwan Bernabëqa Chiprita gobernaq Sergiu Paulutapis yachatsiyarqanmi, peru juk brüjum michëta tïrarqan. Tsëmi Pabluqa, “Jehoväqa qampa contrëkim këkan” nirqan. Y tsë höram tsë brüju wiskuyärirqan. Tsëta rikëkurmi tsë gobernadorpis creikoq tikrarirqan.

Pabluwan Bernabëqa më tsëchömi yachatsikuyarqan: wayin wayimpis, mercädukunachöpis, nänikunachöpis y Diosta adorayänan wayikunachöpis. Juk kutim juk cöju nunata Listra markachö kachakätsiyarqan. Tsëmi nunakunaqa pensayarqan pëkunaqa dios kayanqanta, y adorëtam munayarqan. Peru Pabluwan Bernabëqa manam permitiyarqantsu, “¡Diosllatam adoranantsikqa! Noqakunaqa lluta nunakunallam kayä” niyarqanmi. Tsënam, judïu nunakuna chärir, nunakunata Pablupa contran sharkatsiyarqan. Tsëmi rumiwan qompar ushayarqan, y wanushqa kanqanta pensarmi markapita waqtaman qarachëkur jaqiriyarqan. ¡Peru Pabluqa kawëkarqanmi! Y creikoq mayinkuna chärirmi yanapayarqan y apakuyarqan. Tsëpitaqa Antioquïatam Pablu kutikurqan.

Pabluqa 49 watachömi yapë viajarqan. Y Asia Menor ëwëchö creikoqkunatam watukarqan. Nïkurmi Diospita alli willakïkunata  yachatsikurnin Euröpa ëwëyaq charqan. Atënaschö, Ëfesuchö, Filïpuschö, Tesalönicachö y mas markakunachömi yachatsikurqan. Timoteu jutiyoq jövin, Sïlas y Lücasmi yanaqäyarqan. Mas congregacionkunata patsätsiyänampaq y creikoqkunata yanapayänampaqmi juntu trabajayarqan. Pabluqa Corintuchöpis juk wata pullanmi quedakurqan, y creikoqkunatam valorta qornin yanaparqan. Jina yachatsikur y congregacionkunaman cartakurmi karqan. Y carpakunata rurarmi trabajaq. Tsëpitaqa yapëmi Antioquïaman kutirqan.

Tsëpitanam Pabluqa 52 watachöpis yapë viajarqan. Tsë kima kaq viäjinchöqa Asia Menorpitam yachatsikur qallarqan. Filïpusyaqmi uma kaq lädupa viajarqan. Nïkurmi Corintuman urarqan. Jina Ëfesuchöpis yachatsikur, qeshyëkaqkunata kachakätsir y creikoqkunata yanaparmi atska watakuna karqan. Jina Tiränupa escuëlampa ëllukäyänan salonninchömi llapan ëllukaqkunata yachatseq. Tsëmi mëtsikaq creikuyarqan y kawëninkunata cambiayarqan. Tsënö më tsë sitiukunachö Diospa alli willakïninkunata yachatsikurirmi Pabluqa Jerusalenman kutirqan.