Apostolcunaca Jesús mandashca shinami alli huillaicunata muyundij allpapi huillarcacuna. Huata 47-pica Antioquiamanta huauquicunaca Pablota, Bernabetapish Diosmanta huillachunmi cacharcacuna. Ishquindijmi Asia Menorpi tiyaj llajtacunaman rircacuna. Chaipimi Derbe, Listra, Iconio pueblocunapi cushilla huillarcacuna.

Pablo, Bernabeca tucuicunamanmi huillajcuna carca. Charijcunaman, huajchacunaman, jovencunaman, yuyajcunamanmi huillarcacuna. Chaimi achcacunaca Jesusta catijcuna tucurca. Paicunaca Chipreta mandaj Sergio Paulomanpishmi Diosmanta huillarcacuna. Pero shuj brujoca ama huillachunmi jarcasha nirca. Chashna jarcasha nijpimi Pabloca, ‘Jehová Diosca cantaca llaquichingami’ nirca. Chai ratomi paica ciego saquirirca. Mandaj Sergioca chaita ricushpami Jesusta cati callarirca.

Chashnallataj mercadocunapi, ñancunapi, sinagogacunapi huasin huasin rishpami Pablopish Bernabepish huillarcacuna. Shuj punllaca Listrapimi shuj suchuta jambircacuna. Chaita ricushpami dioscuna cashcata yuyashpa gentecunaca paicunata adorashun nircacuna. Chaimi Pablopish Bernabepish, ‘Diosllatami adorana canguichij. Ñucanchijca cancuna shinallataj runacunallami canchij’ nircacuna. Pero, huaquin judiocuna shamushpami gentecunata Pablopaj contracuna tucuchun churarcacuna. Chaimantami gentecunaca rumicunahuan shitarcacuna. Ña huañushca cashcata yuyashpami canlla puebloman sirijta aisashpa shitarcacuna. Chai ratomi huaquin huauquicuna shamushpa puebloman cutin yaicuchircacuna. Qꞌuipaca Pabloca Antioquiamanmi tigrarca.

Huata 49-pica Pabloca cutin huauqui panicunata ricunamanmi Asia Menorman rirca. Qꞌuipaca Europaman rishpami Atenas, Éfeso,  Filipos,Tesalónica pueblocunapi, shujtaj ladocunapipish huillarca. Paihuanca Silas, Lucas, Timoteomi rircacuna. Paicunaca congregacioncunata callarichishpami huauqui panicunatapish Diosta alli sirvichun animarcacuna. Corinto llajtapipish huauqui panicunata animangapajmi Pabloca shuj huata chaupita saquirirca. Shinallataj huillashpa, yachachishpami purirca. Cartacunatapish quillcashpami congregacioncunaman cacharca. Carpa huasicunatapish rurashpami trabajarca. Qꞌuipaca Antioquiamanmi tigrarca.

Huata 52-pica cutinmi Pabloca Asia Menorman rirca. Caihuanca ñami quimsa cutin rirca. Paica norteta rishpami Filipos puebloman chayarca, qꞌuipaca Corinto pueblomanmi rirca. Cutin Efesopica huaquin huatacunatami yachachishpa, milagrocunata rurashpa, congregacioncunatapish ayudashpa purirca. Chashnallataj shuj escuelapi tiyaj tandanacuna ucupimi punllanta yachachirca. Chaimi achcacunaca yachachishcata uyashpa Jesusta catijcuna tucurca. Ña achca ladocunapi Diosmanta huillashpami Jerusalenman Pabloca tigrarca.