Llapallan nacionpi Diosmanta willakunankupaq Jesuspa kamachisqantam apostolkunaqa kasukurqaku. Chaymi 47 watapi Antioquiapi kaq iñiqmasinku Pablotawan Bernabeyta kamachirqaku huk lawkunapi Diosmanta willakunankupaq. Chaynapim paykunaqa kusikuyllawanña Asia Menor, Derbe, Listra hinaspa Iconio lawkunapi willakurqaku.

Achkallaña runakunam Pablotawan Bernabeytaqa uyariqku. Huk kutipim Chipre llaqtata kamachiq Sergio Paulo sutiyuq runaman willarqaku, ichaqa layqa ruwaq runam harkakurqa. Chaymi Pablo nirqa: “Qamqa Jehova Diostam piñachinki”, nispa. Chaynata niykuptillanmi chay layqa ruwaq runaqa ñawsayarurqa. Chayta qawaykuspanmi chay kamachiq runapas Jesuspa qatiqninña karqa.

Pablowan Bernabeyqa Diosmantam willakuqku wasin-wasin, mercadokunapi, ñankunapi chaynataq yupaychana wasikunapipas. Listra llaqtapi kachkaspankuñataqmi suchu runata sanoyarachirqaku. Chayta qawaykuspankum runakunaqa dioskuna kasqankuta piensaspanku yupaychayta munarqaku. Pablowan Bernabeymi ichaqa nirqaku: “Jehova Diosllatam yupaychanaqa. Ñuqaykupas qamkuna hina runallam kaniku”, nispa. Chaymantam wakin judiokuna runakunata umacharurqaku Pablota rumiwan chuqapanankupaq. Hinaspam wañurusqanta piensaspanku llaqtamanta hurqururqaku. Ichaqa iñiqmasinkunam yanapaspanku kaqmanta llaqtaman aysarqaku. Chaymantam Pabloqa Antioquiaman kutirqa.

49 watapipas Pabloqa Asia Menor lawmanmi illarqa iñiqmasinkunata watukuq. Diosmanta willakustintaqmi rirqa Europa lawpi Atenas,  Efeso, Filipos, Tesalonica hinaspa huk law llaqtakunamanpas. Chay illasqanpim riysirqaku Silas, Lucas hinaspa Timoteo. Huk sunqullam paykunaqa llamkarqaku sapa llaqtapi Diospi iñiqkuna rikurinankupaq. Chaymantapas Pabloqa wata partenmi Corinto llaqtapi iñiqmasinkunata yachachirqa, hinaspam sapa llaqtapi iñiqmasinkunapaqpas cartakunata qillqarqa. Carpakunata ruwaspantaqmi llamkapakuqpas. Chaymantam kutirqa Antioquia llaqtaman.

52 watapim apostol Pabloqa kaqmanta llaqtakunata watukurqa. Filipos llaqtaman chayaruspanmi kutirqa Corinto llaqtaman, hinaspam unay wata Efeso llaqtapi qiparqa. Chaypim yachachirqa, unquqkunata sanoyachirqa hinaspa iñiqmasinkunatapas yanaparqa. Chaymantapas sapa punchawmi achka runakunapa huñunakunankupi yachachirqa, chaymi achka runakuna mana allin ruwasqankuta saqispanku allin kaqtaña ruwarqaku. Tukuy hinastinpi Diosmanta willakuruspanmi Jerusalenman kutirqa.