O apostolija šungje i zapoved e Isuseskiri te propovedinen o šukar haberi ki celi Phuv. Ko 47 berš a.e., o phralja bičhalgje e Pavle hem e Varnava ko propovedničko patuvanje. Ola sine but revna hem džana sine te propovedinen ki celo Mala Azija sar soj ki Derva, ki Listra hem ki Ikonija.

O Pavle hem o Varnava propovedinena sine sa e manušenge — e čorolenge hem e barvalenge, e ternenge hem e phurenge. But džene prifatingje o čačipe bašo Hristos. Keda o Pavle hem o Varnava propovedingje e upraviteleske taro Kipar, o Sergij Pavle, jekh magioničari manglja te čhinavel len. Ama, o Pavle vakergja leske: „O Jehova ka kazninel tut“. Ko adava momenti, o magioničari korolilo. Keda dikhlja adava o upraviteli, ulo sledbeniko e Isuseskoro.

O Pavle hem o Varnava propovedingje segde — taro kher ko kher, ko pazarija, ko drumija hem ko sinagoge. Keda sasljargje ki Listra jekhe manuše so sine sakati, o manuša so dikhle adava čudo mislingje kaj ola tane devela, hem mangle te obožavinen len. Ama, o Pavle hem o Varnava na mukhle len te keren adava hem vakergje lenge: „Valjani te služinen samo e Devleske! Amen siem samo manuša“. Tegani ale nesave Evreija hem kergje o narodo te ovel protiv o Pavle. O manuša frdingje leske barencar, vlečingje le avri tari diz hem mukhle le mislindor kaj tano mulo. Ama, ov sine dživdo! O phralja odma ale te pomožinen leske hem ingargje le ki diz. Pokasno, o Pavle irangja pe ki Antiohija.

Ko 49 berš a.e., o Pavle gelo ko panda jekh patuvanje. Otkeda irangja pe ki Mala Azija te dikhel e phralen, propovedingja bašo šukar haberi panda podur, ki Evropa. Ov gelo ki Atina, ko Efes, ko Filipi, ko Solun hem ko javera thana. Ko akava patuvanje, e Pavlea gelo o Sila, o Luka  hem jekh terno čhavo, o Timotej. Ola kergje neve sobranija hem pomožingje e phralenge te ačhoven zorale. O Pavle ačhilo ko Korint jekh tekvaš berš hem ohrabrinela sine e phralen. Ov propovedingja, sikavgja hem pišingja pismija dži ko nesave sobranija. Ko isto vreme, kerela sine buti da, kerela sine šatorija. Pokasno o Pavle irangja pe ki Antiohija.

Ko 52 berš a.e., o Pavle gelo ko trito patuvanje. Počmingja tari Mala Azija, hem patujnela sine ko sever sa dži ko Filipi, hem palo adava hulilo tele ko Korint. O Pavle ačhilo nekobor berš ko Efes, hem adathe sikavela sine, sasljarela sine hem pomožinela sine e phralenge. Isto agjaar, sekova dive ikerela sine govorija ki jekh škola. But manuša šunena le sine hem meningje pe. Ko krajo, otkeda propovedingja o šukar haberi ko but phuvja, o Pavle irangja pe ko Erusalim.