O apostolija šundže e Isusesi zapovest te propovedinen o šukar haberi ki celo phuv. Ko 47. berš ki amari era, o phralja andi Antiohija bičhaldže e Pavle hem e Varnava te propovedinen ko razna thana. Akala duj revna propovednikija putujindže ki celo Mala Azija hem hine ko thana sar soj tane i Derva, i Listra hem i Ikonija.

O Pavle hem o Varnava propovedindže sarinendže, bizi razlika da li hine barvalje ja čorore, terne ja phure. But manuša prihvatindže o čačipe ando Isus. Ked o Pavle hem o Varnava propovedindže e Sergejese Pavlese, e upraviteljese ando Kipar, jekh vračari manglja te čhinavi ljen. O Pavle phendža e vračarese: „O Jehova ka kaznini tut.“ Ko odova trenutko, o vračari koroljilo. Ked o Sergej Pavle dikhlja odova, počmindža te verujini ko Devel.

O Pavle hem o Varnava propovedindže svugde, kotar čher ko čher, ko pazarija, ko drumija hem ko sinagoge. Ked ki Listra sačardže jekhe manuše kova hine sakati, okola so dikhlje odova mislindže soj tane devela hem manglje te služinen oljendže. Ama, o Pavle hem o Varnava na mukhlje ljen te čeren odova hem phendže ljendže: „Služinen samo e Devljese! Amen hijam samo manuša sar tumen.“ Alje disave Jevreja hem čhivdže e narodo te protivini pe e Pavlese. Odoljese o manuša fordindže bara upro ljeste, vucindže lje avri andi diz hem mukhlje lje sose mislindže soj tano mulo. Ama, o Pavle hine dživdo. O phralja odmah alje te pomožinen lje hem igardže lje ki diz. Palo odova, o Pavle irindža pe ki Antiohija.

O Pavle ko 49. berš ki amari era dželo ko poklo dujto putovanje. Ked irindža pe andi Mala Azija, propovedindža pana  podur, čak dži i Evropa. Ov dželo ki Atina, ko Efes, ko Filipi, ko Solun hem ko avera thana. Ko akava putovanje e Pavleja dželje o Sila, o Luka hem jekh terno čhavo kova vičindža pe Timotej. On čerdže neve skupštine hem pomožindže e phraljendže te ačhon zoralje. O Pavle ačhilo ko Korint jekh tekvaš berš hem ohrabrindža e phraljen. Ov propovedindža, sikavdža hem pisindža ljila aso nekobor skupštine. Ko isto vreme čerdža hem buti, čerdža šatorija. Palo disavo vreme, o Pavle irindža pe ki Antiohija.

Palo odova, ko 52. berš amari era, o Pavle dželo ko po trito putovanje, hem počmindža andi Mala Azija. Putujindža ko sever sa dži ko Filipi, hem palo odova huljilo telje ko Korint. O Pavle ačhilo nekobor berš ko Efes hem odothe sikavdža, sačardža hem pomožindža e phraljendže. Svako dive ičerdža govorija ki jekh škola. But manuša šundže lje hem menindže pe. Ko krajo, palo odova so propovedindža o šukar haberi ko but phuvja, dželo ko Jerusalim.