Сар и приԥэндя о Иисусо, и апостолоря росԥэнэнас и лащи весть па вся ԥув. Андэ 47 бэрш лэ И. Х. и ԥрала, савэ анда Антиохия, манглэ лэ Павлос и лэ Варнавос тэ жан май дур, кай тэ росԥэнэн важ о Дэл. Кадэла дуй мануша стодэ бут зор, кай тэ обжан вся и Мало Азия (акана пэр латэ ԥэнэн Турция). Вонэ сас андэ Дервия, Листра и Икония.

О Павло и о Варнава росԥэнэнас важ о Дэл всаворэнди, кас вонэ диқэнас. Вонэ росԥэнэнас и барвалэнди и найбарвалэнди, тэрнэ манушэнди и ԥурэнди. Бут мануша патяе андо Христос. О Павло и о Варнава росԥэнэнас важ о Дэл лэ правителёсти андо Кипро, савэс ақарэнас Сергей Павло. Андэ кадэя же время ек мануш, саво калдуий, на домэқэлас, кай вонэ када тэ терэн. Тоди о Павло ԥэндя: «О Иегова тут марэла». И кадэва мануш, саво калдуияс, сразу корайля. Кала о Сергей Павло када диқля, во ашэля христианино.

О Павло и о Варнава росԥэнэнас важ о Дэл андэ всаворэ ҭана. Вонэ росԥэнэнас па цэра, пэ базароря, пэ дрома и андэ синагога, када цэр, кай прожалас и собрания. Еқвар вонэ андэ Листра стодэ пэ пэрнэ лэ манушэс, саво на ԥирэлас. Кала и мануша диқлэ кадэя чуда, вонэ гиндосардэ, кай о Павло и о Варнава, када дэвла. Тоди вонэ закамлэ лэнди тэ тэлён. Но о Павло и о Варнава тердярдэ лэн и ԥэндэ: «Тэ тэлён трэбуй кати лэ Дэвлэсти! Ай амэ мануша». Тоди авелэ дэсавэ иудеёря и подтердэ лэ манушэн, кай вонэ тэ жан против Павло. Вонэ мардэ лэс барэнца, виандярдэ пала форо и ашадэ, кай тэ мэрэл. Но о Павло ашэляпэ жундо! И ԥрала йто авелэ и одындярдэ лэс упалэ андо форо. Прожыля дэсави время и о Павло рисайля андэ Антиохия.

Андо 49 бэрш лэ И. Х. о Павло до дуйто жыля дур тэ росԥэнэн важ о Дэл. Спэрва во зажыля кай и ԥрала андэ Мало Азия, ай тоди жыля  тэ росԥэнэн лащи весть инке май дур, андэ Европа. Во сас андэ кацавэ фороря сар Афины, Эфесо, Филиппы и Фессалоника. Лэса сас о Сила, о Лука и о Тимофеё, саво сас тэрно мануш. Вонэ вместе стидэнас и собрании и дэнас зор лэ христианонэнди, кай лэндэ тэ авэл бари вера. Бэрш епашэса о Павло сас андо форо Коринфо. Котэ во сытярэлас лэ ԥралэн. Во росԥэнэнас важ о Дэл, сытярэлас и пистрояс письморя андэ собрании. О Павло терэлас катуны и кадэлэса во затерэлас ловэ. Прожыля время и во рисайля андэ Антиохия.

Андэ 52 бэрш лэ И. Х. о Павло до трито жыля дур, кай тэ росԥэнэн важ о Дэл. Анда Мало Азия во жыля по северо, андэ Филиппы, ай тоди по юго, андо Коринфо. Набут бэрша во сас андо Эфесо. Котэ во сытярэлас и исцелияс лэ манушэн, ай кадяжэ дэлас зор ла собранияти, сави сас котэ. Кажно дес во росԥэнэнас и дума важ о Дэл андо цэр, кай сас и школа. Бут ко ашундэ лэс и ашэлэ христианоря. И акэ, кала о Павло росԥэндя и лащи весть андэ бут ҭана, во жыля андо Иерусалимо.