Apostolo abvera ntemo wa Yezu toera kumwaza mphangwa zadidi pa dziko yonsene. Mu caka 47 N.W., abale a ku Antyokiya atuma Paulu na Bharnabhe toera kuenda kamwaza mphangwa. Paulendo unoyu, Paulu na Bharnabhe amwaza mphangwa mbuto zakusiyana-siyana za Azya Menori, Dherbhe, Listra na Ikonyo.

Paulu na Bharnabhe, amwaza mphangwa zadidi kuna anthu onsene. Iwo amwaza mphangwa kuna anthu ampfuma, akutcerenga, akugwesera, pontho kuna aphale na atsikana. Anthu azinji atawira undimomwene thangwi ya Yezu. Ntsiku ibodzi, Paulu na Bharnabhe amwazira mphangwa mamuna akhacemerwa Serjio Paulu, wakuti akhali governadoro wa ku Chipre. Mbwenye mpfiti m’bodzi ayesera kuakhondesa. Paulu apanga mpfiti: ‘Yahova anakuthabusa.’ Buluka penepo, mpfiti akhala boliboli. Na kuona pyenepi, Ntongi Serjio asankhula kukhala Nkristu.

Paulu na Bharnabhe akhamwaza mphangwa m’mbuto zonsene. Iwo akhapfundzisa nyumba na nyumba, mbuto zamalonda, m’miseu na m’masinagoga. Pidapita iwo na pa nzinda wa Listra, Paulu na Bharnabhe awangisa mamuna m’bodzi wakulamala. Anthu adaona cirengo ceneci akhanyerezera kuti iwo akhali alungu, natenepa atoma kualambira. Mbwenye Paulu na Bharnabhe alonga: ‘Lekani kutilambira. Lambirani basi ene Mulungu!’ Buluka penepo, Ayuda anango abwera mbacitisa mbumba kusandukira Paulu na Bharnabhe. Na thangwi ineyi iwo aponyera Paulu miyala mbankwekweta mpaka kunja kwa nzinda mbanyerezera kuti afa. Mbwenye Paulu nee akhadafa. Mwakukhonda dembuka, abale abwera toera kumphedza, mbankwata mbaenda naye pontho mu nzinda. Buluka penepo, Paulu abwerera ku Antyokiya.

Mu caka 49 N.W., Paulu acita pontho ulendo unango wakumwaza mphangwa. Pakutoma aenda pontho kaona abale a ku Azya Menori.  Buluka penepo, iye aenda kamwaza mphangwa mbuto zakutali kakamwe, ninga ku Europa. Iye aenda ku Atena, ku Efeso, ku Filipi, ku Tesalonika na m’mizinda inango. Luka na Sila, pabodzi na m’phale unango akhacemerwa Timoti aenda pabodzi na Paulu mu ulendo wace. Iwo aphata basa pabodzi toera kukhazikisa mipingo mbaiphedza toera kukula. Paulu akhala ku Korinto mu caka cibodzi toera kuphedza abale. Iye amwaza mphangwa, apfundzisa na alemba matsamba toera kuatumiza m’mipingo mizinji. Toera kutsalakanika, Paulu akhacitambo basa yakusasanya matenda. Mukupita kwa ndzidzi, Paulu abwerera ku Antyokiya.

Mu caka 52 N.W., Paulu acita pontho ulendo wacitatu wakumwaza mphangwa, mbatoma ku Azya Menori mbaenda mpaka ku Filipi. Buluka penepo aenda ku Korinto. Paulu amala pyaka pizinji ku Efeso mbakamwaza mphangwa zadidi, kuwangisa atenda na kuphedza mpingo. Ntsiku zonsene akhacita nkhani zapakweca mu sala ikulu ya pa xikola. Anthu azinji akhambvesera, adzakhala Akristu. Pidamala iye kumwaza mphangwa zadidi m’madziko mazinji, Paulu aenda ku Yerusalemu.