Abazengele asara ye alingbi na commandement ti Jésus so ayeke ti fa nzoni tënë na ndö ti sese kue. Na ngu 47, aita ti Antioche atokua Paul na Barnabas ti sara mbeni tambela ti fango tënë. Akoli use so, so ayapu na kua ti fango tënë mingi so, atambela na yâ ti Asie Mineure kue, na tapande na akodro tongana Derbé, Lystres nga na Iconium.

Paul na Barnabas afa tënë na azo kue, atâa a yeke azo ti mosoro wala awayere, amaseka wala ambakoro. Gbâ ti azo ayeda na tâ tënë na ndö ti Christ. Tongana Paul na Barnabas afa tënë na Sergius Paulus, so ayeke gouverneur ti Chypre, mbeni zo ti yorö atara ti kanga lege na ala. Paul atene na zo ti yorö ni: ‘Jéhovah ayeke punir mo.’ Mo ye ti bâ, zo ti yorö ni aga waziba. Na bango ye ni so, Gouverneur Paulus aga zo so amä na bê na Nzapa.

Paul na Barnabas afa tënë na ndo kue, da na da, na yâ ti agara, na ndö ti alege nga na yâ ti asynagogue. Na Lystres, tongana ala sava mbeni koli so gere ti lo abuba, azo so abâ miracle ni so apensé ti ala atene Paul na Barnabas ayeke anzapa na ala tara ti voro ala. Me Paul na Barnabas ake na ala, ala tene: ‘Ala voro gï Nzapa oko awe! E yeke gï azo senge.’ Ambeni zo angbâ aga, na ala sara si azo alondo na terê ti Paul. Azo ni abo lo na tênë, ala gboto lo na sese juska ala zia lo na gigi ti gbata ni, na ala bâ ti ala atene lo kui awe. Me, Paul akui ape! Mo ye ti bâ, aita aga a-aidé lo, na ala mû lo ala kiri na lo na yâ ti gbata ni. Na pekoni, Paul akiri na Antioche.

Na ngu 49, Paul asara mbeni tambela ti fango tënë ni nde. Na peko ti so lo kiri lo gue lo bâ aita na yâ ti Asie Mineure, lo fa nzoni tënë na ando so même ayo, na akodro ti Europe. Lo gue na Athènes, Éphèse,  Philippes, Thessalonique nga na ambeni kodro ni. Silas, Luc nga na mbeni maseka-koli so iri ti lo Timothée ague nga legeoko na Paul na yâ ti tambela ni. Ala sara kua legeoko na lo ti zia gere ti acongrégation na sese nga ala sara si acongrégation ni akpengba. Paul angbâ na Corinthe teti ngu oko na ndambo, lo kpengba aita ni. Lo fa tënë, lo fa ye nga lo sû alettre na gbâ ti acongrégation. Lo sara nga kua ti lekengo atente. Ambeni ngoi na pekoni, Paul akiri na Antioche.

Na pekoni, na ngu 52, Paul asara ota tambela ti lo ti fango tënë, lo komanse na Asie Mineure. Lo sara voyage juska na mbage ti nord kâ, na tapande na kodro ti Philippes, na pekoni lo gue na Corinthe. Paul aninga angu mingi na Éphèse, lo fa ye, lo sava azo nga lo mû maboko na congrégation ni. Lo mû nga adiskur lâ na lâ na yâ ti da ti mbeni ekole. Gbâ ti azo amä lo nga ala changé asarango ye ti ala. Na nda ni, na peko ti so lo fa nzoni tënë na yâ ti gbâ ti akodro, Paul ague na Jérusalem.