Den apostel preiki a bun nyunsu na ala sei fu grontapu, soleki fa Yesus ben taigi den fu du. Na ini a yari 47, den brada fu Antiokia seni Paulus nanga Barnabas fu go preiki na difrenti presi. Den tu fayafaya preikiman disi waka na ala sei fu Pikin Asia. Den go na presi soleki Derbe, Listra nanga Ikoniyum.

Paulus nanga Barnabas ben e preiki gi ala sma, awinsi den sma ben gudu noso pôti èn awinsi den ben yongu noso owru. Furu sma poti bribi na ini den leri fu Krestes. Di Paulus nanga Barnabas preiki gi Sergiyus Paulus, a granman fu Siprus, dan wan towfruman pruberi fu tapu den. Paulus taigi a towfruman: ’Yehovah o strafu yu.’ Wantewante a towfruman kon breni. Di Granman Sergiyus Paulus si disi, a tron wan bribiman.

Paulus nanga Barnabas preiki na ala sei. Den preiki oso fu oso, na den wowoyo, na tapu strati èn na ini den snoga. Di den dresi wan lanman na ini a foto Listra, den sma di si a wondru ben denki taki den ben de gado èn den ben wani anbegi den. Ma Paulus nanga Barnabas tapu den. Den taki: ’Anbegi Gado wawan! Wi na libisma nomo.’ Ne wan tu Dyu kon taigi den sma wan lo ogri fu Paulus. Dati meki den sma ben wani kiri Paulus. Den trowe ston na en tapu, den srepi en go na dorosei fu a foto, dan den libi en drape fu dede. Ma Paulus ben de na libi ete! Wantewante den brada kon yepi en èn den tyari en go baka na ini a foto. Bakaten Paulus drai go baka na Antiokia.

Na ini a yari 49, Paulus go preiki baka na difrenti presi. Baka di a drai go baka na Pikin Asia fu luku den brada nanga sisa, a go preiki na  moro fara presi na ini Europa. A go na Ateine, Efeise, Filipi, Tesalonika nanga tra presi. Silas, Lukas nanga wan yonguman di nen Timoteyus ben go makandra nanga Paulus. Den wroko makandra fu seti gemeente èn fu tranga a bribi fu den gemeente. Paulus tan na ini Korente wán nanga afu yari langa fu tranga a bribi fu den brada nanga sisa drape. A ben e preiki, a ben e gi leri èn a ben e skrifi brifi gi furu gemeente. A ben e meki tenti tu fu sorgu gi ensrefi. Baka wan pisi ten Paulus drai go baka na Antiokia.

Na ini a yari 52, Paulus go preiki na difrenti presi fu a di fu dri leisi. A bigin na Pikin Asia. A go te na Filipi na noordsei, dan a go baka na Korente. Paulus tan wan tu yari na Efeise. A gi a gemeente leri, a du wondru fu dresi sma èn a yepi a gemeente. Ala dei a ben e hori lezing tu na wan skoro. Furu sma arki Paulus èn den kenki den libi. Baka di Paulus preiki a bun nyunsu na ini furu kondre, a drai go baka na Yerusalem.