Baphostoli balalela umyalo waJesu wekutsi bashumayele tindzaba letimnandzi emhlabeni wonkhe. Nga-47 C.E., bazalwane base-Antiyokhi batfumela boPawula naBhanabasi kulenye indzawo kuze bayoshumayela khona. Bahamba baya e-Asiya bafike bashumayela edolobheni laseDebe, eListra naseLikhawoniya.

Pawula naBhanabasi bebashumayela bonkhe bantfu, lokufaka ekhatsi labanjingile, labaphuyile, bantfwana kanye nebantfu labadzala. Bantfu labanyenti balalela futsi baba ngemaKhristu. Ngesikhatsi bashumayela Segiyusi Pawulusi, umbusi waseSiphrosi, lesinye sangoma setama kubavimba. Pawula watsi kulesangoma: ‘Jehova utakujezisa.’ Ngekushesha lesangoma saba yimphumphutse. Nakabona loku, Pawulusi waba ngumKhristu.

BoPawula naBhanabasi bebashumayela yonkhe indzawo, emtini ngemuti, etimakethe, emigwacweni nasemasinagogeni. NabaseListra, belapha indvodza lebeyingakwati kuhamba, bantfu nababona kwenteka loku, bacabanga kutsi boPawula babonkulunkulu base bacala kubakhotsamela. Kodvwa boPawula naBhanabasi babekhuta batsi: ‘Khontani Nkulunkulu kuphela! Natsi simane nje sibantfu njengani.’ Kwase kufika emaJuda latsite enta labantfu bebalapho kutsi bajikele Pawula. Bagcoba Pawula ngematje, futsi bamhudvulela ngephandle kwelidolobha, bacabanga kutsi sewufile. Kodvwa Pawula abesaphila. Ngekushesha bazalwane befika bamsita base bahamba naye. Ngekuhamba kwesikhatsi, Pawula wabuyela e-Antiyokhi.

Nga-49 C.E., Pawula watsatsa lolunye luhambo. Nakesuka e-Asiya,  waya kuyoshumayela tindzaba letimnandzi eYurophu. Waya e-Atheni, e-Efesu, eFiliphu, eThesalonika nakuletinye tindzawo. Silasi, Lukha kanye naThimothi losemusha bebahamba naPawula. Basebenta naye bamisa emabandla futsi bawasita kutsi acine. Pawula wahlala eKhorinte umnyaka nehhafu asita bazalwane. Abeshumayela, afundzisa futsi abhalela nemabandla tincwadzi. Abephindze atfunge emathende. Ngekuhamba kwesikhatsi Pawula wabuyela e-Antiyokhi.

Nga-52 C.E., Pawula waphindze watsatsa lolunye luhambo, wacala e-Asiya. Wahamba waya eFiliphu lebeyisenyakatfo wase uya naseKhorinte. Pawula waya e-Efesu wahlala khona iminyaka afundzisa bantfu, abaphilisa futsi asita nemabandla. Abebeka tinkhulumo malanga onkhe ehholweni lesikolwa. Bantfu labanyenti bamlalela futsi baba ngemaKhristu. Nasekashumayele tindzaba letimnandzi kuto tonkhe letindzawo, Pawula waya eJerusalema.