Manga rasulẹ̌ timuhụ parentang i Yesus gunang měmahiạ habarẹ̌ mapia sarang patikụ dunia. Su taung 47 M, tau Sahani su Antiokhia něndolohẹ̌ si Paulus dingangi Barnabas gunang měnginjilẹ̌ sarang tampạ marau. Duang katau esẹ masěmangatẹ̌ ini nakoạ sarang patikụ Asia Kadodọ (orasẹ̌ ini Turki), su manga tampạ kere Derbe, Listra, dingangu Ikonium.

Paulus dingangi Barnabas něnginjilẹ̌ su kěbị taumata, tawẹ soale i sire masusah arau makalạ, mangudạ arau maghurang. Lawọ taumata nangimang si Kristus. Su tempong i Paulus dingangi Barnabas nẹ̌bisara si Sergius Paulus, guběrnurẹ̌ u Siprus, piạ tukang sihir mapulu měnahaghe si rẹ̌dua. Paulus nẹ̌bera su tukang sihir ene, ’Yehuwa sarung měhukung si kau.’ Suwụe tukang sihir ene nawuta. Nakasilo ene, Guběrnurẹ̌ Paulus nangimang si Kristus.

Paulus dingangi Barnabas něnginjilẹ̌ su haghing tampạ, bọu wal᷊e sarang bal᷊e, su pasarẹ̌, su ral᷊eng, dingangu su tampạ pěngangibadang. Su tempong i rẹ̌dua napakapia tau esẹ pěosẹ̌ su Listra, taumata sene nẹ̌pikirẹ̌ i rẹ̌dua ini kai dewa, hakị u ene i sire mapulu maněmbah si rẹ̌dua. Katewe Paulus dingangi Barnabas nẹ̌sěding si sire, kụ nẹ̌bera, ’Kětạeng Mawu botonge sěmbaěngu! I kami taumata wiasa.’ Bọu ene, pirang katau tau Yahudi diměnta kụ něnahowong si sire sarang i sire nẹ̌pědu si Paulus. I sire němal᷊ọ si Paulus dingangu watu, něhiudẹ̌ si sie sarang likudu soa, kụ něněntang si sie ualingu su pěndang i sire i Paulus seng nate. Katewe, i Paulus bědang biahẹ̌! Manga hapị i Paulus nẹ̌tul᷊ung si sie kụ nẹ̌bawa si sie sarang soa. Samurine, Paulus nẹ̌bal᷊ị sarang Antiokhia.

 Su taung 49 M, Paulus saụ dimal᷊eng něnginjilẹ̌. I sie saụ nakoạ sarang Asia Kadodọ, kụ nẹ̌sombang dingangu tau Sahani sene. Bọu ene, i sie něnginjilẹ̌ sarang tampạ limembong marau su Eropa. I sie nakoạ sarang Athena, Efesus, Filipi, Tesalonika, dingangu sarang tampạ bal᷊inẹ. I Silas, Lukas, dingangu anạ mangudạ arenge Timotius, timol᷊e dingange. I sire sěngkasio něndarisị sidang jamaatẹ̌ dingangu něnoghasẹ̌ si sire. Paulus nẹ̌tanạ su Korintus karěngụe sěntaung stengah kụ něnoghasẹ̌ anạu sěmbaụ sene. I sie němahiạ habarẹ̌ mapia, něněntiro, dingangu němohẹ suratẹ̌ gunang manga sidang. I sie lai něhal᷊ẹ̌ nakoạ tahakoạ tenda. Bọu ene, Paulus nẹ̌bal᷊ị sarang Antiokhia.

Su taung 52 M, Paulus saụ někoạ perjalanan utusan injil katělung sul᷊ẹe. Humotong i sie nakoạ sarang Asia Kadodọ. Bọu ene, něnurusẹ̌ sarang Filipi dingangu Korintus. I Paulus lai nẹ̌tanạ pira taung su Efesus. Ndaị sene i sie něněntiro, napakapia taumata masakị, dingangu nẹ̌tul᷊ung sidang jamaatẹ̌. Ěllo-ěllo i sie měnẹ̌nasẹ̌ su ruangan pertemuan su sikol᷊ah. Lawọ taumata dimaringihẹ̌ si sie kụ nẹ̌tobatẹ̌. Samurine, su apang seng něnginjilẹ̌ su lawọ tampạ, i Paulus nakoạ sarang Yerusalem.