Nagneke ty lily i Jesosy hitory i talily soay amy ty firenena maro o apositoli’e reo. Tamy ty taogne 47, le nagnirake i Paoly naho i Barnabasy hitory amy ty faritse maro ty rahalahy ta Antiokia ao. Nitory ta Azia Minora agne, ta Derbe, ta Lystra naho ta Ikonioma agne o mpitory mazoto reo.

Nitoria i Paoly naho i Barnabasy iaby, ndra mahantra ndra mpagnarivo, ndra ajaja ndra ndaty bey. Maro ty ndaty nanjare nino i Kristy. Naho fa nitory tamy i Sergio Paolo, governora ta Sypra agne iareo, le nisy ambiasa nisakagne iareo. Le hoe ty Paoly tamy i ambiasay: ‘Ho vignetse ama’o ty Jehovah.’ Eo naho eo, le nigoa i ambiasay. Naho fa nahatrea izay ty Paolo Governora, le nanjare mpino.

Nitory ta bezara ey, tan-dalagney, tamy ty synagoga ao naho isan- tragno ty Paoly naho i Barnabasy. Naho fa nagnasitragne lahilahy naleme tomboke iareo ta Lystra ao, le maro ty ndaty nihevetse iareo ho andrianagnahare sady te hivavake amy iareo. Faie hoe iareo roe lahy: ‘Andrianagnahare raike avao ro ivavaho’areo!’ Faie nisy Jiosy ila’e nitarike o vahoakeo hanohetse i Paoly. Tinora o vahoakeo vato naho tinaritary iareo ambaly i tanàgney agne ty Paoly, le nenga’e ho mate agne. Faie tsy nimate ty Paoly. Le avy le nisy rahalahy nagnavotse aze sady ninday aze an-tanàgne ao. Niheregne ta Antiokia agne ty Paoly tafara izay.

Nitory tamy ty faritse hafa indraike ty Paoly tamy ty taogne 49. Naho fa boake nitilike ty rahalahy ta Azia Minora agne reke, le nitory ta Eoropa agne. Itoagne iaby ty tane nomba’e: I Atena, i Efesosy,  i Filipy, i Tesalonika naho ty toeragne hafa. Niarake tama’e ty Silasy, i Lioka naho i Timoty. Niharo asa iareo, le nagnoregne fiangonagne naho nagnampe aze hatanjake. Tao’e raike naho tapa’e nitoboke ta Korinto tao ty Paoly sady nampahery ty rahalahy tao. Nitory naho nampianatse sady nanoratse taratasy hoahy ty fiangonagne maro reke. Mpamboatse tragno lay ty asa fiveloma i Paoly. Niheregne ta Antiokia agne reke tafara izay.

Nandeha nitilike faritse fagnintelo’e ty Paoly tamy ty taogne 52, le i Azia Minora ty voaloha’e. Niagnavaratse ta Filipy agne reke, avy eo nandeha ta Korinto agne. Nijanogne ta Efesosy ao taogne maromaro reke. Nampianatse, nagnasitragne naho nagnampe ty fiangonagne tao reke. Nanao lahajaka tamy ty lakilasy malalake raike ka reke isan’andro. Maro ty ndaty nitsanogne, le niova. Niheregne ta Jerosalema agne reke naho fa boake nitory tamy ty tane maro.