Baapostolo bakaatobela malailile aa Jesu aakuti bakambauke makani mabotu nyika yoonse. Mu 47 C.E., bakwesu baku Antiyokeya bakatuma Paulo a Barnaba mulweendo lwakukambauka. Bakambausi bobilo ibasungu aaba bakaunka ku Asia Minor kumasena mbuli ku Derbe, Lustro aku Ikoniyo.

Paulo a Barnaba bakali kubakambaukila bantu boonse kufwumbwa naa mbavwubi naa mbacete, mbana naa mbapati. Bantu banji bakakatambula kasimpe kajatikizya Kristo. Ciindi Paulo a Barnaba nobakakambaukila Sergio Paulu imweendelezi waku Kupro, simasalamuzi umwi wakasola kubalesya. Paulo wakaambila simasalamuzi ooyo kuti: ‘Jehova takuyandi.’ Mpoonya aawo simasalamuzi wakaba moofwu. Naakabona boobo, Mweendelezi Paulu wakaba musyomi.

Paulo a Barnaba bakali kukambauka kuli koonse, ŋanda aŋanda, mumamaaketi, mumigwagwa amuzikombelo. Ciindi nobakaponya mwaalumi mulema ku Lustro, aabo ibakabona maleele aaya bakayeeya kuti bakali baleza aboobo bakasola kubakomba. Pele Paulo a Barnaba bakabakasya akubaambila kuti: ‘Amukombe buyo Leza alikke! Swebo tuli bantu buyo.’ Mpoonya ba Juda bamwi bakaboola akuyunga bantu kuti bamubukile Paulo. Makamu aabantu akamupwaya mabwe akumukwelela kunze aamunzi kumane bakamusiya kabayeeya kuti wafwa. Nokuba boobo, Paulo wakacili muumi! Kakutanainda ciindi cilamfwu, bakwesu bakaboola kuzoomuvwuna akumutola mumunzi alimwi. Nokwakainda ciindi, Paulo wakapiluka ku Antiyokeya.

Mu 49 C.E., Paulo wakapanga lweendo alumbi. Naakapiluka kuyoobona bakwesu ku Asia Minor, wakasakana kapati ciindi naakaunka kuyookambauka ku Europe. Wakaunka ku Atene, Efeso, Filipi, Tesalonika  alimwi amasena aamwi. Sila, Luka alimwi amukubusi wazina lya Timoteyo bakamusangana Paulo mulweendo oolu. Bakabelekela antoomwe kutalisya mbungano alimwi akugwasya bantu kuyuma kumuuya. Paulo wakakkala ku Korinto kwamwaka omwe acisela, kayumya-yumya bakwesu ookuya. Wakakambauka, wakayiisya, alimwi akulemba magwalo kumbungano zinji. Alimwi wakali kubeleka mulimo wakupanga matente. Mukuya kwaciindi, Paulo wakapiluka ku Antiyokeya.

Nokwakainda ciindi, mu 52 C.E., Paulo wakaunka mulweendo lwatatu, kutalikila ku Asia Minor. Wakeenda kutozya kunyika ku Filipi mpoonya wakaselemuka kuya ku Korinto. Paulo wakakkala myaka minji kali mu Efeso, kayiisya, kaponya alimwi akugwasya mbungano. Alimwi wakali kupa makani aabuleya buzuba abuzuba muŋanda mpati yakuswaanganina iyakali aacikolo. Bantu banji bakaswiilila akucinca nzila zyabo. Kumamanino, naakamana kukambauka makani mabotu mumasi manji, Paulo wakaunka ku Jerusalemu.