Baapostolo bakaswiilila malayilile aaJesu akukambawuka makani mabotu munyika yoonse. Mu47 C.E., maKristu bakuAntiyokkiya bakatuma Pawulu aBbarnabba kuti bakakambawuke. Bakambawusi babili aaba basungu bakeenda muAsiya Mayina akumasena aali mbuli kuDerbbe, kuLustra akuLikkawoniya.

Pawulu aBbarnabba bakakambawukila bantu banotede abafwaba, bapati abaniini. Bantu biingi bakakatambula kasimpe kali atala aKristu. Pawulu aBbarnabba nibakakambawukila mweendelezi wakuKkupro uutegwa Sergiyo Pawulu, umwi musondi wakeezya kubakasya. Pawulu wakabuzya musondi kuti: ‘Jehova taziyandi pe nzuchita.’ Kuzwa waawo, musondi wakaba moofu. Naakabona zyakachitika, Mweendelezi Pawulu wakaba musyomi.

Pawulu aBbarnabba bakali kukambawuka kung’anda ang’anda, kumisika, mumigwagwa, amuzikombelo. Chiindi bantu nibakabona Pawulu aBbarnabba kabaponia mwaalumi wakali mulema kuLustra, bakabonaanga mbaleza alimwi bakayanda kubakomba. Pesi Pawulu aBbarnabba bakabakasya kabati: ‘Amukombe Leza luzutu. Swebo tuli bantu biyo.’ Mpawo bamwi maJuda bakapa kuti bantu bapenzye Pawulu. Bantu bakamutulula mabwe Pawulu, bamugwisya aanze amuunzi mpawo bamusiya kabayeeya kuti ulifwide. Pesi Pawulu taakafwide pe! Bazyalwanyina bakamubweza akumutola mumuunzi. Nikwakiinda chiindi, Pawulu wakabweeda kuAntiyokkiya.

Mu49 C.E., Pawulu wakaba alweendo lwachibili. Naakabweeda kuyoobona bazyalwanyina bakuAsiya Mayina, wakakambawukila  kumanyika alikuEurope. Wakayinka kuFilipi, kuTesalonikka, kuAtene akuli amwi masena. Mulweendo oolu, Pawulu wakiinka aSila, Lukka aTimotewo wakali mukubusi. Bakabelekaamwi mukutalisya mbungano akuzisimya. Pawulu wakakkala kuKkorinto kwamunyaka uumwi achisela kalikusungwaazya bazyalwanyina bankuko. Naakali nkuko, wakakambawuka, wakayiisya alimwi wakalembela mbungano zyiingi magwalo. Alubo wakali kuchita mulimu wakupanga matente. Nikwakiinda chiindi, Pawulu wakabweeda kuAntiyokkiya.

Mu52 C.E., Pawulu wakaba alweendo lwachitatu alimwi lweendo oolu wakalusangunina kuAsiya Mayina. Mpawo wakayinka kuFilipi nkwiili kunyika alimwi wakakunukila kuKkorinto. Pawulu wakakkala minyaka miingi kuEfesu, kayiisya, kaponia alimwi kasimya mbungano. Alubo, wakakambawukila bantu muchikolo. Bantu biingi bakaswiilila alimwi bakasanduka. Kumamanino, kali wakambawuka makani mabotu kumasena miingi, Pawulu wakabweeda kuJerusalemu.