Abakwenda ba Yesu bakahondera ekiragiro kye eky’okurarangya amakuru amarungi omu nsi yoona. Omu mwaka 47 C.E., ab’oruganda omu Antyokiya bakatuma omukwenda Paulo na Baranaba kugenda ha rugendo rw’okutebeza. Abatebezi banu ababiri kandi abekambi bakatebeza omu nsi yoona eya Asiya omu biikaro nka Derebe, Rusitura, hamu na Ikonio.

Omukwenda Paulo na Baranaba bakatebeza buli muntu, otwaliremu abanaku, abaguuda, abato hamu n’abakuru. Abantu baingi bakega amananu agarukukwata hali Kristo. Omukwenda Paulo na Baranaba obu bakaba nibatebeza Seregio Paulo, omulemi wa Kupuro, haroho omurogo ayalengereho kubalemesa. Omukwenda Paulo akagambira omurogo onu ati: ‘Yahwe n’akurwanisa.’ Aho n’aho, omurogo onu akafa amaiso. Omulemi Seregio Paulo obuyarozere ekintu kinu, akaikiririzaho amananu.

Omukwenda Paulo na Baranaba bakatebeza omu buli kiikaro kyona, nibagenda nju ha nju, omu butale, ha ngudo, n’omu maso’rokaniro. Obu batambiire omulema omu Rusitura, abantu abarozere eky’amahano kinu, bakatandika kuramya omukwenda Paulo na Baranaba nibatekereza ngu bali baruhanga. Baitu omukwenda Paulo na Baranaba bakabatanga nibabagambira ngu: ‘Yahwe wenka nuwe musemeriire kuramya! Itwe tuli bantu kwonka.’ Hanyuma haroho Abayudaaya abaizire batandika kuleta akaimukirro kandi baletera ekitebe ky’abantu kutabukira omukwenda Paulo. Abantu bakamutera amabaale, bamukurra bamutwara aheru y’orubuga, bamusigayo nibatekereza ngu afiire. Baitu omukwenda Paulo akaba atakafiire! Omu bwire obu, ab’oruganda bakaija bamukonyera bamugarra omu rubuga. Hanyuma y’obwire omukwenda Paulo akagaruka omu Antyokiya.

Omu mwaka 49 C.E., omukwenda Paulo akagenda ha rugendo rundi kutebeza. Obu yarugire omu Asiya kurora ab’oruganda, akongera yatebeza  amakuru amarungi kuhika Bulaaya. Akagenda omu Asene, Efeso, Firipi, Sesalonika, n’omu biikaro ebindi. Sira, Luka, hamu n’omusigazi arukwetwa Timoseo baketeranizaho omukwenda Paulo ha rugendo rwe. Bakakorra hamu kutandikaho ebitebe n’okubikonyera kweyongera kuguma. Omukwenda Paulo akamara omwaka gumu n’ekicweka omu Kolinso n’agumya ab’oruganda. Akatebeza, yayegesa, kandi yahandiikira ebitebe biingi amabbaruha. Kandi yakoraga ehema nk’omulimo gwe gw’okwebeisaho. Obwire bukahika omukwenda Paulo yagaruka omu Antyokiya.

Omu mwaka 52 C.E., omukwenda Paulo akatandikaho orugendo rwe orwakasatu orw’okutebeza, n’atandikira omu Asiya. Akatembera kimu kugenda omu Firipi, kandi yagaruka yasirimukira kimu omu Kolinso. Paulo akamara emyaka nyingi omu Efeso nayegesa, nakiza, kandi n’akonyera ekitebe. Kandi yaherezaga embazo omu kyombeko ky’isomero. Abantu baingi bakahuliiriza kandi bahindura engeso zabo. Hanyuma y’okumara akasumi n’atebeza amakuru amarungi omu biikaro bingi, omukwenda Paulo akagenda omu Yerusalemu.