Иисустуң айытканы дег, элчиннер буянныг медээни бүгү черге суртаалдап турган. Бистиң эраның 47 чылда Антиохиядан акылар Павел биле Варнаваны суртаалдап, аян-чорукче чоруурун дилээн. Ол ийи кызымак суртаалчы Бичии Асияда Дербия, Листра, Иконияны кезипкен.

Павел биле Варнава бай-ядыы-даа, аныяк-кырган-даа улуска суртаалдаарга, хөй улус Христоска бүзүрей берген. Олар Кипрниң чагырыкчызы Сергий Павелге суртаалдап турда, бир караң көрнүр кижи шаптыктап эгелээн. Ынчан Павел элчин: «Иегова сени кезетсин» — дээрге, ол кижи согурара берген. Сергий Павел бүзүрей берип, христиан апарган.

Павел биле Варнава бажыңнар кезип, базаарларга, синагогаларга база каяа-даа суртаалдап турган. Бир катап олар Листрага кылаштавас кижини экиртип каан. Улус ону көргеш, оларны бурганнар деп бодааш, мөгеер деп барган. Ынчалза-даа олар: «Чүгле Бурганга чүдүүр ужурлуг бис. Бис силер-биле дөмей кижилер-дир бис» — дээн. Ынчан чамдык иудейлер чонну Павелге удурландырыпкан. Улус Павелди даштар-биле соп каапкаш, өлген деп бодааш, хоорай даштынче сөөртүп каан. Ынчалза-даа Павел дириг болган! Акылар ону катап хоорайже эккелген. Кезек үе эрткенде, Павел катап база Антиохияже чорупкан.

Бистиң эраның 49 чылда Павел ийиги аян-чоруунче чорупкан. Эгезинде ол Бичии Асияда акыларже аалдааш, Европага суртаалдаар дээш чорупкан. Ол Афины, Эфес, Филипп болгаш  Фессалоника дээр хоорайларны кезип турган. Ооң-биле кады Сила, Лука база аныяк Тимофей чораан. Олар чыыштарны тургузуп, христианнарның бүзүрелин быжыглап турган. Павел Коринфиде акыларны бир чыл чартык ишти өөредип, суртаалдап база чыыштарга чагаалар бижип турган. Павел майгыннар даарап, амыдырап чораан. Соонда ол база катап Антиохияже чорупкан.

Бистиң эраның 52 чылда Павел үшкү аян-чоруун эгелээн. Бичии Асиядан соңгу чүкте Филиппыже, соонда мурнуу чүкте Коринфиже чорупкан. Ол Эфеске каш чыл ишти улусту өөредип, экиртип, чыышка дузалажып турган. Школага ол хүннүң-не илеткелдер чугаалаарга, хөй улус христианнар апарган. Павел аңгы-аңгы черлерге суртаалдааш, Иерусалимче чорупкан.