Ginsugot han mga apostol an sugo ni Jesus nga isangyaw an maopay nga sumat ha bug-os nga tuna. Han 47 C.E., ginsidngan hira Pablo ngan Bernabe han kabugtoan nga kalalakin-an ha Antiokia nga magbiyahe para magsangyaw ha damu nga lugar. Inin duha nga madasigon nga magsarangyaw nagbiyahe ha mga lugar ha Asia Minor sugad han Derbe, Listra, ngan Iconio.

Hira Pablo ngan Bernabe nagsangyaw ha tanan​—riko o pobre, bata o lagas. Damu an kumarawat han kamatuoran mahitungod han Kristo. Han ginsangyawan nira an gobernador han Ciprus nga hi Sergio Paulo, may espiritista nga nagsari pagpaundang ha ira. Ginsidngan ni Pablo an espiritista: ‘Sisirotan ka ni Jehova.’ Nabuta dayon an espiritista. Nakita ito ni Gobernador Paulo, salit nagin tumuroo hiya.

Hira Pablo ngan Bernabe nagsangyaw ha bisan diin​—ha mga balay, merkado, dalan, ngan sinagoga. Han nagtambal hira hin piay ha Listra, an mga nakakita han milagro naghunahuna nga mga dios hira ngan ginsingba hira. Pero ginsaway hira nira Pablo ngan Bernabe: ‘An Dios la an iyo singbaha! Mga tawo la kami.’ Tapos, may nagkaabot nga mga Judio ngan ginkombinse an mga tawo nga kontrahon hi Pablo. Ginbato hiya han mga tawo, gindanas tipagawas han syudad, ngan ginbayaan kay kahuna nira nga patay na hiya. Pero sayop hira, buhi pa hi Pablo! Kumadto dayon an kabugtoan basi buligan hiya ngan gindara hiya tipabalik ha syudad. Ha urhi, bumalik hi Pablo ha Antiokia.

Han 49 C.E., nagbiyahe utro hi Pablo para magsangyaw. Katapos niya bisitahon utro an kabugtoan ha Asia Minor, iginsangyaw niya an  maopay nga sumat ha mas higrayo pa nga lugar​—ha Europa. Kumadto hiya ha Atenas, Efeso, Filipos, Tesalonica, ngan iba pa nga lugar. Upod niya hira Silas, Lucas, ngan an batan-on nga hi Timoteo. Nagburublig hira pag-establisar hin mga kongregasyon ngan pagparig-on hito. Nagpabilin hi Pablo ha Corinto hin usa ngan tunga ka tuig basi parig-unon an kabugtoan didto. Nagsangyaw hiya, nagtutdo, ngan nagsurat ha damu nga kongregasyon. Nagtrabaho liwat hiya sugad nga parahimo hin tolda. Ha urhi, bumalik hiya ha Antiokia.

Han 52 C.E., nagbiyahe hi Pablo ha ikatulo nga higayon para magsangyaw. Nagtikang hiya ha Asia Minor. Nagbiyahe hiya tubtob ha norte ha Filipos, tapos kumadto hiya ha Corinto. Nagpabilin hiya ha Efeso hin pipira ka tuig basi manutdo, manambal, ngan bumulig ha kongregasyon. Kada adlaw, nagpapahayag hiya ha awditoryum hin eskwelahan. Damu an namati ngan nagbag-o. Katapos ni Pablo isangyaw an maopay nga sumat ha damu nga lugar, bumalik hiya ha Jerusalem.