Ŵandumetume ŵapikanile lilamusi lya Yesu lyakuwandisya utenga wambone pacilambo cosope. Mu 47 C.E., abale ŵa ku Antiyokeya ŵamtumisye Paulo ni Banaba paulendo wakulalicila. Jemanjaji ŵajesile m’cilambo cosope ca Asia Minor, mpaka kuja kwika ku mikuli ja Debe, Lusitala soni Ikoniyo.

Paulo ni Banaba ŵamlalicilaga mundu jwalijose, jwakusicila kapena jwakulaga, mwanace kapena jwamkulungwa. Ŵandu ŵajinji ŵajiticisyaga usyesyene wakwamba Yesu. Paulo ni Banaba paŵamlalicilaga Seligiyo Paulo, juŵaliji jwakulamulila jwa upande wa Kupulo, jwamasenga jwine jwalekasyaga jemanjaji kulalicila. Paulo ŵamsalile jwamasengajo kuti, ‘Yehofa nganaŵa ni mmwejo.’ Ndaŵi jijojo, meso ga jwamasenga jula gatatele. Ali ayiweni yeleyi jwakulamulila Seligiyo Paulo jwaŵele jwakulupilila.

Paulo ni Banaba ŵalalicilaga kulikose. Ŵajawulaga kunyumba sya ŵandu, m’misika, m’misewu soni m’nyumba syakupopelela. Jemanjaji ŵamposisye mundu jwamlemale ku Lusitala. Nambo ŵandu ŵaŵaciweni cakusimonjesyaci ŵaganisyaga kuti jemanjaji ali milungu, mwamti ŵatandite kwalambila. Nambo Paulo ni Banaba ŵalekasisye jemanjajo kuti, ‘Mumlambileje Mlungu jikape! M’weji tuli ŵandu.’ Kaneko Ayuda ŵane ŵayice ni kwatendekasya ŵanduwo kuti amjimucile Paulo. Likuga lya ŵanduwo lyamsomile maganga Paulo ni ŵamkopwesye kusa ali asigele panandi kuwa. Nambope Paulo nganawa. Ndaŵi jijojo abale ŵayice ni ŵamkamucisye ni kumjigalila mumsinda. Kaneko Paulo ŵawujilesoni ku Antiokeya.

M’caka ca 49 C.E., Paulo ŵajesilesoni ulendo wine wakulacila. Paŵawujilaga kuti akalole abale ku Asia Minor, jwalakwe jwalalicilesoni  utenga wambone mpaka kuja kwika ku Europe. Jwapite ku Atene, Efeso, Filipi, Tesalonika, ni m’mikuli jine. Sila, Luka soni Timoteyo juŵaliji mnyamata ŵajendaga yalumo ni Paulo pa maulendoga. Jemanjaji ŵatamilikasyaga mipingo soni ŵaliji mkujilimbikasya. Paulo ŵatemi ku Kolinto kwa caka cimo ni hafu. Pandaŵiji ŵaliji mkwalimbikasya abale kweleko. Jwalakwe jwalalicilaga, kwiganya soni kujilembela yikalata mipingo jejinji. Jwakamulagasoni masengo gakupanganya yitenti. Kaneko Paulo ŵawujilesoni ku Antiokeya.

Mkupita kwa ndaŵi, m’caka ca 52 C.E., Paulo ŵajesilesoni ulendo watatu wakulalicila. Ŵatandile ku Asia Minor ni ŵajesile mpaka kuja kwika kumpoto kusyesyene kwa Filipi kaneko ŵayice ku Kolinto. Paulo jwatemi yaka yakuŵalanjika ku Efeso, ali mkwiganya, kuposya ŵandu ŵakulwala soni kujikamucisya mipingo. Jwaŵecetagasoni ngani kwa ŵandu ŵajinji lisiku lililyose m’nyumba jakusasongana ŵandu pasukulu. Ŵandu ŵajinji ŵapikanilaga ni ŵacengaga yitendo yawo. Pambesi pakulalicila utenga wambone m’yilambo yejinji, Paulo ŵajawile ku Yelusalemu.